Ijtimoiy tarmoqlarda Jizzax viloyatining Mirzacho‘l tumani Gagarin shaharchasida yo‘lovchi talashgan taksichilar o‘rtasida janjal yuzaga kelgani, ulardan biri ikkinchisini mashinasining kapotida sudrab ketgani tasvirlangan video tarqaldi. Holat bo‘yicha viloyat IIB Jamoat xavfsizligi xizmati YHXB tomonidan surishtiruv ishlari olib borilgan.
Aniqlanishicha, bir nechta haydovchilar yo‘lovchi tashish faoliyati bilan shug‘ullanish uchun maxsus litsenziyaga ega bo‘lmay turib, yo‘lovchi (mijoz) talashgan va o‘rtada nizoli holat yuzaga kelgan. Oqibatda Lacetti haydovchisi o‘zga bir shaxsning hayotiga xavf soluvchi hamda yo‘l-transport hodisasini keltirib chiqarishi mumkin bo‘lgan harakatni amalga oshirgan.
Holat yuzasidan Lacetti haydovchisiga nisbatan Ma’muriy javobgarlik to‘g‘risidagi kodeksning 128-moddasi (haydovchilarning transport vositalarini piyodalar yo‘lkalaridan yurgizishi, yo‘l belgilari va yo‘l harakatining boshqa qoidalari talablariga rioya etmasligi) bilan ma’muriy bayonnoma rasmiylashtirilgan. Shuningdek, tortishuvning boshqa ishtirokchilariga nisbatan hududiy profilaktika inspektorlari tomonidan qonunda belgilangan tartibda choralar ko‘rilmoqda.
Bundan oldin Surxondaryoda YPX xodimini Lacetti kapotida sudrab ketgan haydovchi qamoqqa olingani, Samarqandda YPX inspektorining to‘xtash ishorasiga bo‘ysunmagan Damas haydovchisi ushlangani to‘g‘risida xabar berilgandi.