AQSH har doim Rossiyaga qarshi yangi sanksiyalar kiritishga ochiq va mazkur masala G7 sammitida hamkorlar bilan muhokama etiladi. Bu haqda AQSH prezidenti Jo Bayden ma’lum qildi, deb yozmoqda “Interfaks”.
“Biz qo‘shimcha sanksiyalar joriy qilishga hamisha ochiqmiz”, — degan Bayden Oq uydagi chiqishi vaqtida.
AQSH prezidenti shu haftada G7 a’zolari bilan mazkur masala yuzasidan maslahatlashuvlar amalga oshirilishini qayd etgan.
Avval Yevrokomissiya rahbari Ursula fon der Lyayen YI tomonidan Rossiyaga qarshi qo‘llanadigan navbatdagi sanksiyalar paketi haqida ma’lumot bergandi.“Oltinchi sanksiyalar paketi bugun e’lon qilinadi. Ro‘yxatga Rossiyaning yuqori lavozimdagi amaldorlari, Buchadagi harbiy jinoyatlarga javobgar shaxslar kiritilgan. Shuningdek, “Sberbank” SWIFT tizimidan uzib qo‘yiladi va YI hududida Rossiyaning uchta davlat telekanali translyatsiyasi to‘xtatiladi. So‘nggi qadam — Rossiya nefti xaridini bosqichma-bosqich taqiqlash bo‘ladi”, — degan Yevrokomissiya rahbari.
YI Rossiya neftidan bosqicha-bosqich voz kechmoqda, fon der Lyayenning so‘zlariga ko‘ra, ushbu masala yechimi olti oy vaqt talab qiladi va 2022-yil oxirida yakuniga yetkaziladi.