“Yuventus” hujumchisi Paulo Dibala faoliyatini “Inter”da davom ettiradi.
La Gazzetta dello Sport nashrining xabariga ko‘ra, hujumchi “nerazzurilar” bilan 4 yillik shartnoma imzolashga yaqin. Argentinalik “Inter” safida bonuslardan tashqari yiliga 6 million yevro ishlab topadi.
Yaqinda shartnomalarini yangilagan Lautaro Martines va Marselo Brozovich ham “Inter”da yiliga 6 million yevro maosh oladi. Dibalaga ham shuncha maosh to‘lashi uchun milanliklar Arturo Vidal, Aleksis Sanches va Matias Vesino bilan xayrlashmoqchi.
Yevropaning turli klublari, jumladan, Madridning “Atletiko”si ham Dibalaga qiziqish bildirgandi. Ammo “nerazzurilar” boshqalarga qaraganda qat’iyatliroq harakat qildi.
“Inter” Pauloni keyingi mavsumdan boshlab klubning sport loyihasida asosiy rol ishonib topshirishiga ishontira oldi. Undan tashqari, boshqa ligaga o‘tmasdan, faoliyatini A Seriyada davom ettirish Dibalaning asosiy maqsadlaridan biri edi.
Argentinalik bilan muzokaralarda futbolchi bilan yaxshi munosabatda bo‘lgan Milan klubi bosh direktori Beppe Marotta muhim rol o‘ynadi. Aynan Marottaning harakatlari bilan Dibala 2015-yilda “Palermo”dan “Yuventus”ga o‘tgan edi.
Eslatib o‘tamiz, argentinalik futbolchining “Yuventus” bilan shartnomasi 2022-yil yozida o‘z nihoyasiga yetadi va u erkin agent sifatida klubni tark etadi.
28 yoshli futbolchi 2021/22-yilgi mavsum “Yuventus” safida barcha musobaqalarda 35 ta o‘yin o‘tkazib, 14 ta gol va 6 ta golli uzatmaga mualliflik qildi.
Izoh (0)