O‘zbekistonda spinal mushak atrofiyasi tashxisi qo‘yilgan bemor bolalar davlat tomonidan zarur vositalar bilan ta’minlanadi. Bu haqda Sog‘liqni saqlash vazirligi xabar berdi.
Elmira Bositxonova ma’lum qilishicha, mamlakatda bu xastalikka chalingan bemorlar uchun zarur dori, reabilitatsiya va maxsus ozuqa vositalari davlat budjeti hisobidan xarid qilinmagan va bemorlarda faqatgina simptomatik muolaja o‘tkazilgan. Buning oqibatida bolalarda kasallik og‘ir kechib, erta o‘lim bilan yakunlangan.
Prezidentning tegishli qarori bilan endilikda spinal mushak atrofiyasi tashxisi qo‘yilgan bolalar davlat tomonidan patogenetik dorilar, ortopediya moslamalari va reabilitatsiya vositalari bilan ta’minlanadi.
Hujjatda 1-iyuldan boshlab nikohlanuvchilar o‘z hisobidan Aholi reproduktiv salomatlik markazining filiallari orqali molekulyar genetik testdan o‘tishi qayd etilgan.
Qayd etilishicha, Tibbiy-ijtimoiy xizmatlarni rivojlantirish agentligi tomonidan 2022-yil 1-iyundan boshlab uy sharoitida davolanayotgan bemor bolalarga zarur bo‘lgan texnik (15 turdagi) vositalar bepul ijaraga beriladi.
Bundan avval O‘zbekistonda 1-apreldan boshlab chet eldan olib kiriladigan tibbiy jihozlar QQS va bojxona bojidan ozod qilinishi haqida xabar berilgandi.
Izoh (0)