“Chegara bilmas muxbirlar” xalqaro nohukumat tashkiloti tomonidan tuziladigan So‘z erkinligi indeksining 2022-yilgi reytingida O‘zbekiston o‘z ko‘rsatkichlarini birdan 24 pozitsiyaga yaxshilab, 157-o‘rindan 133-o‘ringa ko‘tarildi. Bu haqda prezident matbuot kotibi Sherzod Asadov ma’lum qildi.
“Shu munosabat bilan prezidentimiz rahbarligida mamlakatimizda so‘z erkinligini ta’minlash, ommaviy axborot vositalarini jamoatchilik fikrini ifoda etadigan ‘to‘rtinchi hokimiyat’ga aylantirish borasida qo‘yilayotgan muhim qadamlarning natijalaridan biri bo‘lgan ushbu katta muvaffaqiyat bilan yurtimiz jurnalistikasi, ommaviy axborot vositalari va media sohasi vakillarini tabriklayman”, — deb yozadi u.
Ushbu reytingda dastlabki uchlikni Norvegiya, Daniya va Shvetsiya egallagan. Rossiya esa 155-o‘ringa tushib ketgan. Reytingdagi oxirgi 180-o‘rinda Shimoliy Koreya, 179-o‘rinda Eritreya joylashgan.
Markaziy Osiyo davlatlari ichida eng yuqori ko‘rsatkichni Qirg‘iziston qayd etgan — 64,25 ball bilan 72-o‘rin. Undan keyingi pog‘onalarda Qozog‘iston — 122-o‘rin, Tojikiston — 152-o‘rin, Afg‘oniston — 156-o‘rin, Turkmaniston — 177-o‘rinda joylashgan.
“Chegara bilmas muxbirlar” yillik hisoboti 2002-yildan buyon chop etib kelinadi. Ushbu hisobotda 180 mamlakatdagi matbuotning holatiga baho beriladi.
Eslatib o‘tamiz, 2017-yilgi reytingda O‘zbekiston 169-o‘rinni, 2018-yilda esa to‘rt pog‘ona yuqorilab 165-o‘rinni egallagan edi. Shuningdek, O‘zbekistonda mazkur reytingda 2019-yili — 160-o‘rinni, 2020-yil esa 156-o‘rinni band etgandi.
Izoh (0)