Chempionlar Ligasidan chetlatilgan “Zenit”ning o‘rnini qaysi jamoa egallashi ma’lum bo‘ldi

Rossiya Premyer Ligasi klublari 2022/23-yilgi Chempionlar Ligasida ishtirok eta olmaydi.

UEFA Rossiya terma jamoalari va klublarini Yevrokubok musobaqalaridan chetlatgani xabar qilingandi. Muddatidan avval Rossiya chempioniga aylangan “Zenit” endi YChL 2022/23-yilgi mavsumida ishtirok eta olmaydi.

Xabarlarga ko‘ra, Rossiya klubining o‘rnini Shotlandiya chempioni egallaydi. Hozirda ushbu o‘rin uchun ikki jamoa kurashmoqda: chempionat tugashiga 3 tur qolganda 86 ochko jamg‘argan “Seltik” va 80 ochko to‘plagan “Reynjers”.

Eslatib o‘tamiz, UEFA Rossiya terma jamoasi va klublarining maqomi, shuningdek, ularning tashkilot tasarrufidagi musobaqalarida ishtirok etish masalasini ko‘rib chiqib, ularni Yevrokubok musobaqalaridan chetlatdi.

28-fevral kuni FIFA va UEFA Ukrainadagi vaziyat tufayli Rossiya terma jamoalari va Rossiya klublarini barcha xalqaro musobaqalarda ishtirok etishdan chetlatdi. Rossiya terma jamoasi esa xalqaro musobaqalardan chetlatilgani munosabati bilan uning o‘rniga Polsha JCh—2022 saralashi pley-offining finalida o‘ynashi xabar qilingandi.