Namangan viloyat IIB Yo‘l harakati xavfsizligi boshqarmasiga yangi rahbar tayinlandi. Bu haqda “Daryo” muxbiri Azizbek Abduvaliyev xabar bermoqda.
Boshqarmada bo‘lib o‘tgan yig‘ilishda ichki ishlar vazirining tegishli buyrug‘i bilan Namangan viloyat IIB Yo‘l harakati xavfsizligi boshqarmasi boshlig‘i lavozimiga tayinlangan podpolkovnik Anvar Hafizov shaxsiy tarkibga tanishtirildi.
Anvar Hafizov 1978-yilda Samarqandda tug‘ilgan. Samarqand davlat universiteti huquqshunoslik fakultetini tamomlagan. Ichki ishlar idoralaridagi faoliyatini Toshkent shahar Ichki ishlar bosh boshqarmasida boshlagan. Faoliyati davomida Ichki ishlar vazirligi Yo‘l harakati xavfsizligi bosh boshqarmasida turli vazifalarda ishlagan.
Mazkur tayinlovga qadar Anvar Hafizov Navoiy viloyat IIB Yo‘l harakati xavfsizligi boshqarmasi boshlig‘i lavozimida ishlab kelayotgandi.
Eslatib o‘tamiz, joriy yil 11-fevral kuni prezident huzurida bo‘lib o‘tgan videoselektor yig‘ilishida Namangan viloyatida o‘lim bilan bog‘liq avariyalar har 100 ming aholiga 13 tani tashkil etib, boshqa hududlarga nisbatan ancha yuqori ekanligi tanqid qilingandi.
Izoh (0)