O‘zbekiston muftiysi Ramazon hayiti sanasi nega haligacha e’lon qilinmayotgani sababini ma’lum qildi

O‘zbekiston muftiysi Nuriddin Xoliqnazarov Ramazon hayiti bayrami nega erta e’lon qilinmayotgani sababini aytdi. Bu haqda Fatvo hay’ati xabar qildi.

Qayd etilishicha, Musulmonlar idorasida Ramazon oyi va hayitini munosib kutib olish, islom dini tartib-qoidalari asosida hilolni kuzatish bo‘yicha ishchi guruh tuzilgan.

“Fatvo hay’atimiz hozirda astronom olimlar bilan birgalikda Ramazon hayiti kunining aniq sanasini hisoblash bilan mashg‘ul bo‘lyapti. 30-aprel buning xulosasini beramiz. Shunga qarab Hayit sanasini e’lon qilamiz. Shunda har yilgidek prezidentning bayram bo‘yicha qarori qabul qilinadi”, — deydi muftiy Nuriddin Xoliqnazarov.

Bundan avval Shavkat Mirziyoyev hokimlarga Ramazon hayitini yuqori saviyada o‘tkazish bo‘yicha topshiriq bergani, Ramazon hayiti munosabati bilan Nukus, Termiz va yana uchta viloyatga qo‘shimcha aviaqatnovlar yo‘lga qo‘yilishi, Uzbekistan Airways Ramazon hayiti munosabati bilan chegirma e’lon qilgani xabar qilingandi.