“Jizzax va Samarqanddagi toshqin oqibatlarini bartaraf etish bo‘yicha tegishli choralar ko‘rilmoqda” — Tanzila Norboyeva

Jizzax va Samarqanddagi toshqin oqibatlarini bartaraf etish bo‘yicha tegishli choralar ko‘rilmoqda. Bu haqda Senat raisi Tanzila Norboyeva Oliy Majlis Senatining yigirma beshinchi yalpi majlisida aytdi, deb xabar bermoqda “Daryo” muxbiri.

Senat raisi prezidentning Qashqadaryo viloyatiga tashrifi haqida gapirib, ushbu tashrif ham viloyat rivojida yangi marralar olinishiga asos bo‘lganini aytdi.

“O‘tgan galgi majlisimizda biz ushbu viloyatda yangi tuman – Ko‘kdala tumanini tashkil etish bo‘yicha qaror qabul qilgan edik. Tashrif doirasida prezident ushbu tumanda ham bo‘lib, uni har tomonlama rivojlantirish bo‘yicha misli ko‘rilmagan darajadagi katta ishlarga tamal toshi qo‘ydi. Qashqadaryoni rivojlantirish bo‘yicha ham hukumat qarori bilan 5 yillik chora-tadbirlari qabul qilindi. Hududlarimizga bo‘layotgan bunday yuksak e’tibor hududlar palatasi sifatida bizni xursand qilishi tabiiy va ayni paytda mas’uliyat ham yuklaydi”, — dedi Senat raisi.

Tanzila Norboyeva yaqinda ro‘y bergan sel toshqinlari oqibatida ayrim hududlar, xususan Jizzax va Samarqand viloyatlari aholisi talafot ko‘rganini eslab o‘tdi.

“Ming afsuski, qurbonlar ham bo‘ldi. Fursatdan foydalanib, tabiiy ofat oqibatida halok bo‘lganlarning oila a’zolariga va yaqinlariga barcha senatorlar nomidan hamdardlik izhor etaman. Toshqin oqibatlarini bartaraf etish bo‘yicha tegishli choralar ko‘rilmoqda. Ishonamizki, hukumatimiz tez fursatlarda mazkur hududlardagi shart-sharoitlar to‘liq tiklanishini ta’minlaydi”, — deydi u.