Turkmaniston aprel oyida Ukrainaga gumanitar yordam jo‘natadi. Bu haqda Turkmaniston tashqi ishlar vazirligi matbuot xizmati xabar berdi.
“Turkmaniston turkman xalqining insonparvarlik an’analaridan kelib chiqib, joriy yilning aprel oyida Ukraina xalqiga insonparvarlik yordamini jo‘natadi”, — deyilgan vazirlik bayonotida.
Gumanitar yuklar orasida dori vositalari va respublika tibbiyot sanoatining boshqa mahsulotlari, shuningdek, to‘qimachilik mahsulotlari bor, deyiladi TIV xabarida.
Turkmaniston hukumati Ukrainadagi jangovar harakatlar mavzusida o‘ta ehtiyotkor. Bu mavzuga rasmiy fikr bildirilmagan. Vazirlik xabarida ham yordam nima munosabati bilan yuborilayotgani aytilmagan.
Turkmaniston va Ukraina o‘rtasidagi diplomatik munosabatlar 1992-yilning oktabrida o‘rnatilgan.
Aprel boshida O‘zbekiston Ukrainaga 34 tonnadan ortiq gumanitar yordam yuborgan edi. Ukrainaning Karpatorti viloyatiga O‘zbekistondan dori-darmon, individual dori qutilari, uzoq muddat saqlanadigan oziq-ovqat mahsulotlari, jami 400 ming donadan ortiq bo‘lgan 21 ta pozitsiyadagi mahsulot yetkazib berilgan.
Eslatib o‘tamiz, 17-mart kuni O‘zbekiston tashqi ishlar vaziri Abdulaziz Komilov Ukraina atrofida bo‘layotgan mojaro yuzasidan O‘zbekistonning pozitsiyasini aytgandi. “O‘zbekiston Ukraina mustaqilligi, suvereniteti va hududiy yaxlitligini tan oladi. Biz Lugansk va Donetsk mustaqilligini tan olmaymiz”, — deya ta’kidlagan TIV rahbari.
Izoh (0)