O‘zbekistonda haydovchilarga o‘z avtomobillariga turli yozuvlar, qo‘lbola stiker va belgilarni osish taqiqlandi. Bu haqda 1-maydan kuchga kiradigan yangi Yo‘l harakati qoidalarida ko‘zda tutilgan.
Yo‘l harakati qoidalarining 176-bandi yangi xatboshi bilan to‘ldirilgan bo‘lib, unga ko‘ra taniqlik belgilardan boshqa taniqlik belgilarini o‘rnatish, shuningdek, transport vositasining kuzovi va oynalariga turli xil yozuvlar kiritish taqiqlanadi, transport vositasining kuzoviga reklama maqsadlarida belgilangan tartibda yozuvlar kiritish bundan mustasno.
Shuningdek, ushbu bandda transport vositalariga o‘rnatiladigan taniqlik belgilari keltirib o‘tilgan: “avtopoyezd”, “turumlangan” (tishli, shipli), “bolalar guruhini tashish”, “kar haydovchi”, “boshqarishni o‘rgatish uchun mo‘ljallangan mexanik transport vositasi”, “tezlik cheklangan”, “xavfli yuk”, “katta o‘lchamli yuk”, “uzun o‘lchamli transport vositasi”, “avariya sababli to‘xtash”, “shifokor”, “nogironligi bo‘lgan shaxs”, “haydovchilikni endi boshlagan”.
Ruxsat etilmagan taniqlik belgisidan foydalanganlik uchun qancha jarima qo‘llanishi noma’lum.
Avvalroq O‘zbekistonda yangi tahrirdagi Yo‘l harakati qoidalari tasdiqlangani to‘g‘risida xabar berilgandi. Unga ko‘ra, avtomobil old o‘rindig‘ida o‘tirib xavfsizlik kamarini taqmagan yo‘lovchi jarimaga tortilishi mumkin, YPX xodimidan dislokatsiyani so‘rash talabi bekor qilingan.
Izoh (0)