2019-yilda dunyodagi eng keksa ayol sifatida tan olingan yaponiyalik Kane Tanaka 19-aprel kuni 120 yoshida vafot etdi. Bu haqda NHK telekanali xabar berdi.
Kane Tanaka 1903-yilda rus—yapon urushi vaqtida Kumakichi va Kuma Ota oilasida tug‘ilgan. Oilaning Kanega qadar olti nafar farzandi bo‘lgan. U ikkita jahon urushidan omon chiqqan va beshta imperator boshqaruvini ko‘rgan, xususan, islohotchi imperator Meydzidan tortib amaldagi Naruxitogacha.
Kane Tanaka 19 yoshida Xideo Tanakaga turmushga chiqqan va oilaning to‘rt nafar farzandi bo‘lgan, shuningdek, ular bir nafar bolani asrab olgan. Xideo guruch, yapon shirinliklari va udon lapshasini ishlab chiqaruvchi oilaviy biznesni boshqargan. Ayolning eri va to‘ng‘ich o‘g‘li Ikkinchi jahon urushida qatnashgan, Nobuo ismli farzandi esa SSSRda asirga olinib, 1947-yilda Yaponiyaga qaytgan.
Kane turmush o‘rtog‘ini armiyaga olib ketishgach, oilaviy biznes bilan shug‘ullanishni boshlagan va 103 yoshiga qadar do‘konlar boshqaruvida ishtirok etgan.
2019-yilning martida Kane Tanaka sayyoradagi eng keksa ayol sifatida Ginnesning rekordlar kitobiga kiritilgan edi. U hatto Yaponiyada umr ko‘rish davomiyligi bo‘yicha rekord o‘rnatgan.
So‘nggi yillarda Tanaka Fukuoka prefekturasidagi qariyalar uyida yashab kelgan va yanvar oyida 119 yoshini nishonlagan. NHK’ning ta’kidlashicha, ayol 120 yoshgacha yashashni xohlashi haqida gapirgan.
Bundan oldin yaponiyalik 107 yoshli opa-singillar Ginnesning rekordlar kitobidan dunyodagi eng keksa egizaklar sifatida o‘rin olgani, sayyoraning eng keksa ayoli uzoq umr ko‘rish bo‘yicha rekord o‘rnatgani to‘g‘risida xabar berilgandi.
Izoh (0)