Ijtimoiy tarmoqlarda “Samarqand viloyatida Ichki ishlar boshqarmasiga tegishli mashinada yosh bolalarni ‘gruzovoy’ga ortganday ortishibdi” sarlavhasi ostida videolavha tarqaldi. Viloyat Ichki ishlar boshqarmasi holatga munosabat bildirdi.
Qayd etilishicha, 23-aprel kuni Samarqand viloyati IIBga qarashli Voyaga yetmaganlarga ijtimoiy huquqiy yordam ko‘rsatish markazi xodimi o‘ziga biriktirilgan Damas transport vositasi bilan 3 nafar voyaga yetmagan bolani tibbiy ko‘rikdan o‘tkazib, markazga olib qaytayotgan bo‘lgan. Tasvirlardagi holatda voyaga yetmagan A.A. mashinaning pastga tushirilgan orqa o‘rindig‘ida yotib ketgani aks etgan. Qolgan ikki nafar bola mashinaning o‘rta qatoridagi o‘rindiqda o‘tirib ketgan.
Mashinadagi voyaga yetmaganlarni nazoratsiz qoldirgan xodimga nisbatan viloyat IIB mas’ul xodimlari tomonidan xizmat tekshiruvi tayinlanib, yakuni bo‘yicha qat’iy chora ko‘rilishi belgilangan.
“Shu o‘rinda ayrim tarmoq faollari, jurnalist va blogerlardan holatni tekshirmasdan, buzib talqin qilmasliklarini so‘raymiz”, — deyiladi xabarda.
Avvalroq Farg‘onada haydovchi Damas’da 28 nafar bog‘cha bolasini olib ketayotgani xabar qilingandi. Shuningdek, Surxondaryoda haydovchi Damas’da 16 nafar yo‘lovchini olib ketayotgani, Surxondaryoda 16 nafar fuqaroni olib ketayotgan “Jiguli” to‘xtatilgani haqida xabar berilgan.
Izoh (0)