Jizzax viloyatining Forish tumanidagi sel oqibatlari va uning odamlar hayotiga ta’siri haqida gapirgan forishlik yana bir ayol Muhayyo Soyibova “Daryo” bilan suhbatda o‘sha kuni ko‘rgan-bilganlarining eng dahshatlisi qo‘shni hovli darvozasi oldidan yosh qizning murdasi topilganini aytmoqda.

“O‘sha kuni kechki payt soat beshlarda ishdan qaytdim. Kelsam, uyimiz tomonga hech kimni o‘tkazishmayapti. Biz ham uyga o‘tolmadik. Shu yerda qutqaruvchilar qo‘shnimizning suvda oqib ketgan nabiralarini izlashayotgan ekan. Keyin qo‘shnimizning darvozasi oldidan bir jasad topishdi. Yosh qizning murdasi ekan. Qo‘lma-qo‘l qilib ko‘tarib, shifoxonaga olib kirib ketishdi”, — deydi Muhayyo Soyibova.

Muhayyo Soyibova.

“Daryo” / Ilhom Xursanaliyev

Suhbatdosh ayolning aytishicha, o‘sha kuni ular uyiga o‘tkazilmay, yuqori tomondagi qo‘ni-qo‘shnilar xonadoniga yuborilgan.

“O‘sha kungi dahshatli sel yoshi katta o‘qituvchini ham oqizib ketgan. Shuningdek, mahalla raisining kelini va ikki nabirasini olib ketgan. Yosh qizchalardan biri va onasining murdasi o‘sha kuni topilgan. Ikkinchi qizaloq murdasi esa keyingi kuni topilgan”, — deydi suhbatdosh.

Egizbuloq qishlog‘ida yashovchi Shavkat Soyibov ham o‘sha kuni sodir bo‘lgan sel haqida gapirib, selga g‘arq bo‘lgan qizaloqlardan birining murdasini uyi yonidan topganini aytmoqda.

Shavkat Soyibov.

“Daryo” / Ilhom Xursanaliyev

“O‘sha kuni selda oqib ketgan 11-sinf qiz pochchamning qizi bo‘ladi. Yosh qizaloqlar va ularning onasi esa yuqoridagi qo‘shnimizning kelini va nabiralari edi. Men seldan zo‘rg‘a omon qolib, ko‘chaga chiqsam, uyimiz yonida burchakka tiqilib qolgan qizaloq murdasini ko‘rdim. Bu qo‘shnimizning nabirasi edi. Keyin bu haqda qutqaruvchilarga xabar berdim. Birozdan so‘ng esa o‘sha qizchaning onasi topildi. Ikkinchi qizaloq esa ertasi kuni ancha joyga oqib borgan manzilidan topildi”, — deydi Shavkat Soyibov.

“Daryo” bilan suhbatda bo‘lgan Dilfuza Sayaqulova ham aynan shu 11-sinf o‘quvchisi haqida gapirib, “Ularning uyi selning aynan yo‘lida joylashgani uchunmi, ularda sel bizdan-da kuchli bo‘lgan. Qizning akasi onasi va singlisini qutqarish uchun ularni ushlagan. Onasini ko‘tarib olib, singlisiga o‘zini qattiq ushlab olishi kerakligini tayinlagan. Ammo, afsuski, qizning qo‘li akasini qattiq ushlolmay, chiqib ketgan va selda oqib ketgan”, — degandi.

Shu qishloqda yashovchi Avaz Abdug‘aniyev suvga g‘arq bo‘lgan qizaloqlarning biri beshinchi, ikkinchisi birinchi sinf o‘quvchisi bo‘lganini aytmoqda.

Avaz Abdug‘aniyev.

“Daryo” / Ilhom Xursanaliyev

“Sel bizdan yuqori yashovchi yana bir oilaning uch nafar vakilini, mahallamiz raisining kelini va ikki nabirasini oqizib ketdi. Xayriyatki, eng kichik qizi o‘sha kuni bog‘chada bo‘lgan va omon qolgan”, — deydi Avaz Abdug‘aniyev.

Avaz Abdug‘aniyevning qo‘shimcha qilishicha, sel qurbonlaridan yana biri shu qishloqda yashovchi yoshi oltmishlarga borgan matematika fani o‘qituvchisi bo‘lgan.

“Sel ustozimiz, matematika fani o‘qituvchisi ham oqizib ketgan. Uning murdasini ham sal naridan topishdi. Rahmatli juda yaxshi inson edi”, — deydi Avaz Abdug‘aniyev.