Jizzax viloyatining Forish tumanida kelgan sel 53 ta xonadonni yashab bo‘lmas darajaga keltirdi. Besh nafar fuqaro o‘limiga sababchi bo‘ldi. Achinarlisi, marhumlarning uch nafari bir xonadon vakillari edi. Bu haqda voqea joyida bo‘lgan “Daryo” muxbiri xabar berdi.
Ma’lum qilinishicha, sel 2022-yilning 20-aprel kuni tushdan so‘ng kelgan va 1 soat-u 30 daqiqa davom etgan.
“Ammo sel 12 daqiqada qishloq taqdirini hal qildi. 26 bosh sigir, yuzlab mayda shoxli mollarni oqizib ketdi. Bir oilaning uch nafar vakili — yosh ona va uning hali ona suti og‘zidan ketmagan jajji qizaloqlari sel qurboniga aylandi”, — deydi shu qishloqda yashovchi aholi vakillaridan biri.
Forish tumani hokimligi axborot xizmati rahbari Rashid Karimovning mutaxassislar ma’lumotiga tayanib xabar berishicha, hududdagi sel beshta soydan oqqan sel suvlari qo‘shilishi natijasida yuzaga kelgan.
“Sel ‘Egizbuloq’da joylashgan 263 ta xo‘jalikdan o‘tib, ularning 53 tasini to‘liq yaroqsiz holga keltirgan. 44 tasiga esa o‘rtacha va 163 tasiga yengil darajada talafot yetkazgan. Shuningdek, sel hududdagi 15-maktab va 9-bog‘cha hududiga ham kirgan. 1,5 km ichki yo‘llarga sel suvlari toshishi oqibatida transport vositalari harakati vaqtinchalik to‘xtatilgan”, — deydi Rashid Karimov.
“Daryo” muxbiri bilan suhbatlashgan qishloq vakillarining aytishicha, qishloqqa 80 yil ilgari xuddi shunday sel kelgan. Undan keyingi yillardagi sellar bu darajada vahimali va talafotli bo‘lmagan.
“Tushlik qilib bo‘lgach, soatga qaraganimda 13:40 ekan. Birozdan so‘ng qattiq ovoz eshitildi. Ko‘chaga ‘KaMAZ’ keldimi deb, yugurib chiqdim. Chiqsam, hovlini suv bosa boshladi. Yugurib uyga kirdim va uydagi stol ustiga chiqdim. Suv yana ko‘paygach, stolning ustiga kir yuvish mashinasini ham qo‘ydim va uning ustiga chiqdim. Keyin suv qo‘shnining uyi devorini buzib o‘tdi. Men esa vahimaga tusha boshladim. Yaxshiyam uyda faqat o‘zim edim. Shu holatda zo‘rg‘a jon saqladim”, — deydi voqea haqida gapirgan Shavkat Soyibov.
Forish tumani hokimi o‘rinbosari Abdumannon Saidxonov ayni paytda “Egizbuloq” MFYda joylashgan 25 ta xo‘jalikda istiqomat qiluvchi 100 dan ortiq fuqarolar vaqtinchalik yashash uchun yaqin qarindoshlarining uyiga ko‘chirilganini aytmoqda. Ular uchun hayotiy zarur mahsulotlar zaxirasini shakllantirish maqsadida shtab ham tashkil etilgan.
Viloyat Favqulodda vaziyatlar boshqarmasi axborot xizmati rahbari Farrux Abdurahmonovning ma’lumot berishicha, ayni kungacha hududga 15 ta organdan 1363 nafar yordamchi kuch hamda 63 ta texnika jalb qilingan bo‘lib, sel oqibatlarini bartaraf etish bilan shug‘ullanmoqda.
“Daryo” ijodiy jamoasi voqea tafsilotlarini o‘rganishda davom etmoqda.
Izoh (0)