Shavkat Mirziyoyev Qarshidagi UzShoes qo‘shma korxonasi faoliyati bilan tanishgandan so‘ng safarini yakunlab, Toshkentga qaytib keldi

Shavkat Mirziyoyev 22-aprel kuni Qarshi shahridagi kichik sanoat zonasida joylashgan UzShoes qo‘shma korxonasi faoliyati bilan tanishdi. Bu haqda Prezident matbuot xizmati xabar qildi.

Qayd etilishicha, Qashqadaryoda charm xomashyosi ko‘p hisoblanadi. Davlat rahbari viloyatga avvalgi tashrifi chog‘ida bu imkoniyatdan foydalanib, charm mahsulotlarini qayta ishlashni yo‘lga qo‘yish bo‘yicha ko‘rsatma bergan. Shundan so‘ng hududda 4 ta loyiha ishga tushirilgan. Xususan, UzShoes korxonasi belaruslik ishbilarmonlar bilan hamkorlikda 6 million dollar evaziga tashkil etilgan. Korxonaga Germaniya, Italiya va Avstriyadan uskuna va jihozlar keltirib o‘rnatilgan. 350 ta ish o‘rni yaratilgan.

Korxona yiliga 500 ming juft poyabzal ishlab chiqarish quvvatiga ega. Bugungi kunda erkaklar, ayollar va bolalar uchun 10 turdagi charm poyabzallar tayyorlanmoqda. Sifatli va chiroyli bu mahsulotlar import o‘rnini bemalol bosadi.

Shuningdek, Qarshida tikilgan poyabzallar Yevropa mamlakatlaridagi 100 dan ortiq savdo do‘konlarida sotilmoqda. Qo‘shni davlatlar va Hindiston bilan kelishuvlarga erishilgan.

Davlat rahbari poyabzallarni tayyorlash jarayonini ko‘zdan kechirgan, shu yerda ishlayotgan xotin-qizlar bilan suhbatlashgan.

Bundan tashqari, Prezident Qarshi shahrida sport ta’limi bo‘yicha taqdimot bilan tanishgan. Sportni rivojlantirish vaziri yoshlar o‘rtasida ommaviy sportni rivojlantirish chora-tadbirlari bo‘yicha 1-aprel kuni o‘tkazilgan yig‘ilishdagi vazifalar ijrosi to‘g‘risida hisobot bergan. Mutasaddilarga chet ellik mutaxassislarni jalb etib, seleksiya ishlari va o‘quv dasturini to‘g‘ri shakllantirish bo‘yicha ko‘rsatmalar bergan.

Shu bilan Shavkat Mirziyoyev Qashqadaryo viloyatiga tashrifini yakunlab, Toshkentga qaytib kelgan.