Prezident Shavkat Mirziyoyev Qarshi shahrida bo‘lib o‘tayotgan xalq deputatlari viloyat kengashining navbatdan tashqari sessiyasida uy-joy masalasiga ham to‘xtaldi. Bu haqda “Daryo” muxbiri xabar berdi.
Davlat rahbarining aytishicha, 2022-yilda jami 5 ming 36 kvartirali 143 ta ko‘p qavatli uy-joylar foydalanishga topshiriladi.
“Koson tumanining ‘Do‘stlik’, Yakkabog‘ tumanining ‘Ayg‘irko‘l’ mahallalarida va Ko‘kdala tumanining Yettitom shaharchasida ‘Yangi O‘zbekiston’ massivlarini barpo etishni boshladik. Bunda, shu yilning o‘zida 1 316 kvartirali 65 ta ko‘p qavatli uylar, 3 ta bog‘cha, 3 ta maktab, 1 ta tibbiyot muassasasi va ko‘plab zamonaviy xizmat ko‘rsatish obyektlari quriladi”, — deydi davlat rahbari.
Bundan tashqari, “O‘zbekneftgaz” tomonidan, yangi tashkil etilgan GTL zavodi ishchilarini uy-joy bilan ta’minlash uchun, G‘uzor tumanida ham “Yangi O‘zbekiston” massivi barpo etiladi va 2022-yilda 200 xonadonli 10 ta ko‘p qavatli uy foydalanishga topshiriladi.
Viloyat aholisiga 730 milliard so‘mlik imtiyozli ipoteka kreditlari hamda 1 795 ta ehtiyojmand oilaga 72 milliard so‘m subsidiya ajratiladi. Shuningdek, 2022-yili 30 ta qishloq va mahallalar “Obod qishloq” va “Obod mahalla” dasturlari bilan qamrab olinib, bunga 460 milliard so‘m yo‘naltiriladi. Natijada, 131 ming nafar aholi, jumladan “temir”, “ayollar” va “yoshlar” daftarlariga kiritilgan 4 ming nafar fuqaroning yashash sharoiti yaxshilanadi.
Bundan tashqari, 2022-yilda 99 ta ko‘p qavatli uylarni ta’mirlash, atrofini obodonlashtirish, bolalar maydonchalarini qurishga 36 milliard so‘m yo‘naltiriladi. Aholining madaniy dam olishi va hordiq chiqarishi uchun, Qarshi tumanining “Chaman” mahallasi hududidagi 50 gektar maydonda yangi uy-joy massivi va “Yangi O‘zbekiston” bog‘i bunyod etiladi.
Mavzuga doir:
