Madrid sudi UEFAga Yevropa Superligasi tashkilotchilarini jazolashni taqiqlash qarorini bekor qildi
UEFA Superliga loyihasi asoschilariga nisbatan sanksiyalar qo‘llashi mumkin. Madrid sudi UEFAga qo‘yilgan taqiqni olib tashladi.
Madridning yangi sudyasi Sofiya Xil o‘zidan oldingi sudyaning UEFAga Yevropa Superligasini tashkil etgani uchun “Real”, “Barselona” va “Yuventus”ga jazo qo‘llashni taqiqlash haqidagi qarorini bekor qildi.
Sud jarayoni 14-iyun kuni tomonlar ishtirokidagi yig‘ilishda davom etadi.
Avvalroq UEFA Yevropa Superligasi asoschilari, shuningdek, dastlab Superligaga kirib, undan so‘ng chiqib ketgan jamoalarga nisbatan jarimalarni bekor qilgandi.
“Barselona” prezidenti Xoan Laporta Yevropa Superligasi loyihasi yopilmaganini aytib o‘tgandi.
Undan avval Yevropa Superligasi g‘oyasini qo‘llab-quvvatlovchi “Barselona”, “Real” va “Yuventus” yozda o‘rtoqlik o‘yinlari tashkillashtirmoqchiligi haqida xabarlar chiqqan edi.
2021-yilning 18-aprel kuni 12 klub boshchiligida Yevropa Superligasiga asos solingandi. Oradan ikki kun o‘tib qator klublar birin-ketin loyihani tark eta boshladi va Superliga loyihasi vaqtincha to‘xtatildi.
