Sirdaryo viloyatining Yangiyer shahridagi “Abdurahmon Jomiy” MFYda yengil avtomobilga o‘rnatilgan gaz balloni portlab ketdi, deb xabar beradi viloyat FVB axborot xizmati.
Ma’lum qilinishicha, 21-aprel kuni soat 09:50 larda Yangiyer shahrining Paxtakor ko‘chasida joylashgan “Vatanparvar” tashkiloti binosi ro‘parasida qoldirilgan, 28 yoshli haydovchi B.Q.ga tegishli Nexia-3 rusumli avtomobilning gaz ballonida yorilish sodir bo‘lgan. Natijada avtomobil butkul yaroqsiz holga kelgan va yonidagi 2 ta avtotransport vositalariga texnik zarar yetgan.
Hodisa natijasida tan jarohati olgan fuqarolar yo‘q. Hozirda viloyat FVB va IIB YHXB xodimlari tomonidan dastlabki surishtiruv ishlari olib borilmoqda.
Bundan avval Buxoroda “Volga”ning gaz balloni portlashi oqibatida ikki kishi vafot etgani, Surxondaryodagi zapravkada Lacetti’ning gaz balloni portlab ketgani hamda Toshkentda Lacetti bilan to‘qnashgan Nexia yonib ketgani haqida xabar berilgandi.
Mavzuga doir:
Izoh (0)