Rossiya banki raisi Elvira Nabiullina mamlakatda barcha zarur moliyaviy resurslar mavjudligi, davlat defolt xavfi ostida emasligini bildirdi. Bu haqda “Vedemosti” xabar berdi.
“Rossiyada barcha zarur moliyaviy resurslar mavjud. Hech qanday defolt bizga tahdid solmayapti”, — dedi u.
6-aprel kuni Rossiya Moliya vazirligi 649,2 million dollarlik yevroobligatsiyalar bo‘yicha o‘z majburiyatlarini bajarganini ma’lum qildi. Vazirlik birinchi marta to‘lovlarni rublda amalga oshirdi.
Xorijiy vakillik banki chet el valyutasida to‘lovni amalga oshirishdan bosh tortdi. Shuning uchun vazirlik Rossiya banklarida maxsus yaratilgan investorlarning rubl hisob raqamlariga mablag‘ o‘tkazishga majbur bo‘ldi.
Fitch xalqaro reyting agentligi Rossiyaning dollar obligatsiyalari bo‘yicha foizlarni rublda to‘lashi 30 kundan keyin defoltga sabab bo‘lishidan ogohlantirgan edi.
Moliya vaziri Anton Siluanov mart oyi o‘rtalarida Rossiya Markaziy banki va hukumati aktivlarini muzlatishga qaror qilgan xorijiy davlatlar Rossiyada sun’iy defolt yaratish niyatida ekanini aytdi.
Mamlakatda majburiyatlarni bajarish uchun zaruriy miqdorda mablag‘ bor, – dedi u.
Moliya vazirligi materiallaridan kelib chiqqan holda, joriy yilda Rossiya 2,66 milliard dollar qarzni, jumladan, 2,53 milliard dollar xorijiy valyutadagi davlat qimmatli qog‘ozlarini, 132 million dollar qiymatdagi xorijiy hukumatlar, xalqaro moliya tashkilotlari va xorijiy yuridik shaxslarning kreditlarini to‘lashi kerak.
17-mart kuni Moliya vazirligi tashqi qarz bo‘yicha 117,2 million dollarlik obligatsiyalar bo‘yicha kuponlar to‘laganini ma’lum qildi. To‘lov vazirlik topshirig‘i bilan xorijiy valyutada amalga oshirilgan. Bu zaxiralarning bir qismi muzlatilganidan keyin Rossiyaning tashqi qarzi bo‘yicha birinchi to‘lov edi.
Avvalroq Rossiya 4-maygacha investorlarga dollar to‘lamasa, defolt bo‘lishi mumkinligi haqida xabar berilgan edi.
Izoh (0)