“Bankda ishladim, qizimni turmushga berdim va endi ijodga qaytdim”. Sobiq “Jonim” guruhi xonandasi Aziza Nasriddinova bilan suhbat

Sobiq “Jonim” guruhining xonandasi Aziza Nasriddinova MY5 telekanalining “Omon-omon” ko‘rsatuviga intervyu berdi. Intervyu davomida u ijodiy tanaffusning sababi, bugungi oilaviy ahvoli haqida gapirdi.

“Bankda ishladim, ammo san’atdan ketolmadim”

— Pushtirang bolaligim Toshkent markazida o‘tgan. Onam qiziqishlarimni e’tiborsiz qoldirmay, “Paxtaoy” nomli vokal cholg‘u-ansambliga olib borgan. U yerda avvaliga sintezator chalishni o‘rganganman. Undan keyin vokal mashg‘ulotlarini o‘tishgan.

Ammo maktabni bitirgandan keyin Toshkent davlat iqtisodiyot universitetida o‘qishga qaror qildim. Chunki ingliz tili va matematika bo‘yicha bilimim yaxshi edi. Egallagan mutaxassisligim bo‘yicha 3 yil bankda ham ishladim. Ammo baribir san’atga bo‘lgan intilishim so‘nmadi.

“Jonim” kim sabab tashkil etilgandi?

— “Jonim” guruhining tashkil etilishi juda oddiy bo‘lgan. 1999-yili mahoratli bastakor Vagif Zokirov g‘oyasi asosida guruhga asos solingan. 2000-yilda “Tarona shou”ning Yangi yil konsertida ilk marta Shahzoda bilan guruh sifatida katta sahnaga chiqqanmiz. Odamlar ijodimizni yaxshi qabul qilishgan, ammo ikki yildan so‘ng ikkimiz ham alohida ijod qilishga qaror qildik. 2003-yili yakka holda “Borman” nomli albomimni sotuvga chiqardim. Qo‘shiq o‘sha yilning eng xit qo‘shig‘i sifatida e’tirof etildi. U paytlarda internet yo‘q, qo‘shiqlar faqat radio va televideniyeda berilsa ham, tinglovchilarning san’atga bo‘lgan mehri yuqori edi.

“Yetti yil tanaffus qilishimning sababi...”

— O‘ylab qarasam, oxirgi klipimni 2015-yilda suratga olgan ekanman. Undan keyin farzandlarim tarbiyasi va oilaviy masalalar sabab ijodiy tanaffus qilishimga to‘g‘ri keldi. Yetti yil davomida ijod qilmagan bo‘lsam ham, xayolan san’atdan uzoqlasholganim yo‘q. Chunki ijodkorning san’atdan butunlay ko‘ngil uzishi juda qiyin. Orada shuncha yil tanaffus qilgan bo‘lsam ham, haligacha odamlar “Qachon yangi qo‘shiq chiqarasiz?”, “Sizni sog‘indik, ijod qiling”, deb yozishadi. Xullas, meni kutgan muxlislar uchun beshta eski qo‘shiqlarimni yangicha talqinda ijro etdim. Yaqin kunlarda klip ham suratga olishni rejalashtiryapmiz. “Tanaffus qilsam, o‘rnimni yo‘qotib qo‘yaman”, degan qo‘rquv yo‘q. Chunki san’atda har bir ijodkorning o‘rni va o‘ziga yarasha tinglovchisi bor. Raqobatdan esa umuman qo‘rqmayman.

“Katta qizimni turmushga berdim”

— Ikkita farzandim bor. Katta qizimni turmushga berganman. Ammo ko‘pchilik “Qizini turmushga bergan ayolga o‘xshamaysiz. Juda yosh ko‘rinasiz”, deyishadi. Yosh ko‘rinishimning siri juda oddiy, uyda muntazam fitnes bilan shug‘ullanaman. Ko‘p emas, ikki-uchta harakatlarni har kuni takrorlayman. To‘g‘ri ovqatlanishga ham alohida e’tibor beraman, shu xolos.

“Qo‘shiqlarim dolzarbligini yo‘qotmagan”

— Shu kungacha yaratgan qo‘shiqlarimning musiqasini o‘zim bastalaganman. Bobur Bobomurod, Ibrohim Jiyanov va Shahnoz she’rlaridan foydalanganman. Shu bois qo‘shiqlarimning bari zamon tanlamaydigan, aktualligini yo‘qotmaydigan deb aytolaman. Masalan, ikki turmushli insonlarga bag‘ishlab kuylangan “Ikki hayot” qo‘shig‘i ham haligacha dolzarbligini yo‘qotmagan. “Jonim” guruhi odamlarning qalbidan joy olgan. U ko‘pchilikning bolaligi yoki yoshlik yillarini eslatadi, desam xato bo‘lmaydi. Shu bois Aziza Jonim taxallusi bilan ijod qilishga qaror qildim.

Eslatib o‘tamiz, 2010-yilda xonanda Shahzoda prodyusserligida yangi tarkib bilan “Jonim” guruhi tashkil etilgandi. Madina va Mira ismli qizlardan tarkib topgan guruh “Yondim”, “Qaramagin ko‘zlarimga” nomli qo‘shiqlarni ijro etgan. Yodgor Nosirov tomonidan ularga klip ham suratga olingan edi. Ammo ko‘p o‘tmay Mira guruhni tark etdi. Garchi guruhga yangi xonanda qabul qilingan bo‘lsa-da, yangi tarkibdagi “Jonim”ning davomiyligi ham uzoqqa bormadi.