Tadbirkorlar faoliyatiga noqonuniy aralashgan va to‘sqinlik qilgan 885 nafar mansabdor shaxs intizomiy va ma’muriy javobgarlikka tortilgan. Bu haqda 21-aprel kuni bo‘lib o‘tgan Senat majlisida bosh prokuror o‘rinbosari Erkin Yo‘ldoshev ma’lum qildi, deya xabar bermoqda “Daryo” muxbiri.
Erkin Yo‘ldoshevning aytishicha, tadbirkorlar ishiga to‘sqinlik qilish holatlari bir qator davlat idoralarining mansabdor shaxslari tomonidan sodir etilgan.
“Afsuski, tadbirkorlar huquqlarini buzilish holatlari uchrayotgani bor gap. Jumladan, 2021-yilda tadbirkorlar faoliyatiga noqonuniy aralashish, to‘sqinlik qilish kabi 24 mingga yaqin holatlar qayd etildi. Bu juda katta raqam. Bular asosan gaz, elektr energiyasi, hokimlik, qurilish va kadastr, bank va soliq idoralarining mansabdor shaxslari tomonidan sodir etilgan. Albatta, shunga yarasha qattiq choralar ham ko‘rildi. Xususan, 619 ta qonunga zid hujjatlarga protestlar keltirildi. 885 nafar mansabdor intizomiy va ma’muriy javobgarlikka tortildi. 499 ta holatda jinoyat ishlari qo‘zg‘atildi. Natijada 14 ming 749 nafar tadbirkorning buzilgan huquqlari tiklanishiga erishildi”, – dedi Bosh prokuratura rasmiysi.
Erkin Yo‘ldoshevning ta’kidlashicha, fuqarolar, xususan, tadbirkorlar huquqlarini sud orqali himoya qilish mexanizmi ishlamoqda.
“Birgina 2021-yilning o‘zida tadbirkorlarning manfaatlarini himoya qilish bo‘yicha iqtisodiy sudlarga 41,5 milliard so‘mlik 658 ta da’vo arizalari kiritildi. Shundan 35,3 milliard so‘mlik 654 ta da’vo arizalarimiz qanoatlantirildi”, — dedi Erkin Yo‘ldoshev.
Yig‘ilishda prokuratura organlari tomonidan 29 mingdan ortiq tadbirkor va investorlarga turli masalalarda jumladan, 481 nafariga bino, 3 ming 532 nafariga yer, 1 ming 496 nafariga litsenziya va ruxsatnomalar, 9 ming 243 nafariga kredit ajratilishida amaliy yordam berilgani aytildi.
Izoh (0)