O‘zbekiston Mudofaa vazirligi harbiy xizmatchilari “ArMI—2022” xalqaro armiya o‘yinlari doirasida o‘tkazilgan “Sayan yurishi” musobaqasida kuchli uchlikdan o‘rin oldi. Bu haqda vazirlik matbuot xizmati “Daryo”ga ma’lum qildi.
Ma’lum qilinishicha, bir necha kun davomida Rossiya hududida o‘tkazilgan musobaqada O‘zbekiston, Xitoy, Rossiya, Rossiya ayollar jamoasi, Qirg‘iziston, Tojikiston, Eron, Abxaziya va Janubiy Osetiya davlatlaridan jami 9 ta jamoa ishtirok etgan.
Musobaqa nizomiga ko‘ra, jamoalar harakatlanish qiyin bo‘lgan tog‘ hududlarida 50 kilometrlik marshrutni bosib o‘tib, 12 ta shart bo‘yicha ko‘rsatilgan me’yorlarni mahorat bilan bajargan.
Umumiy natijalar bo‘yicha Rossiya jamoasi birinchi, Xitoy jamoasi ikkinchi, o‘zbekistonlik harbiy xizmatchilari esa uchinchi o‘rinni egallagan. G‘olib va sovrindorlarga medal hamda xalqaro armiya o‘yinlarining esdalik sovg‘alari tantanali ravishda topshirilgan.
Ta’kidlanishicha, 17-aprel kuni mazkur musobaqada ishtirokchilari Toshkent xalqaro aeroportida tantanali ravishda kutib olingan.
Avvalroq o‘zbekistonlik harbiylar Britaniyada o‘tkazilgan “Kembriya patruli” musobaqasida 2-o‘rinni egallagani, O‘zbekiston jamoasi “ArMI-2021” xalqaro armiya o‘yinlari yakuni bo‘yicha umumjamoa hisobida 2-o‘rinni egallagani to‘g‘risida xabar berilgandi.
Izoh (0)