Hilton Group tarmog‘i Buyuk Britaniyada faqat avtomobillar uchun mo‘ljallangan noodatiy mehmonxonani ochdi, deb xabar beradi Motor.
O‘ziga xos Hilton Car Storage mehmonxonasi Xartfordshir grafligidagi Bishops-Stortford shahrida ochilgan bo‘lib, uch qavatli binoning maydoni 7 ming kvadrat metrni tashkil etadi.
Ma’lum qilinishicha, bu yerga tashlab ketilgan mashinalarning xavfsizligi kun-u tun ta’minlanadi va bino to‘liq kuzatuv tizimiga ega. Mashinalar yaxshi saqlanishi uchun optimal harorat va namlik darajasini ushlab turuvchi maxsus iqlim tizimi mavjud.
Avtomobil egasi qo‘shimcha himoya sifatida mashinasini maxsus g‘ilof bilan berkitib qo‘yishi mumkin. Mijoz bu yerdan mashinani istalgan vaqtida olib keta oladi, shuningdek, mehmonxonada “yashash” vaqti tugagach, u o‘z egasiga yetkazib ham beriladi.
Avtomobil mehmonxonada qoldirilgan vaqtda texnik xizmat ko‘rsatish, klassik avtomobillar restavratsiyasi yoki sport mashinalarini poygaga tayyorlash kabi xizmatlar ham ko‘rsatilishi mumkin. Zarurat tug‘ilsa, Hilton & Moss Restoration mutaxassislari avtomobilni dunyoning istalgan nuqtasiga yetkazib beradi.
Mavzuga doir: Toyota ayollar uchun maxsus avtomobil ishlab chiqardi
Izoh (0)