Mercedes-Benz kompaniyasi Vision EQXX konsept-kari bir marta quvvatlanish orqali “1000 kilometrdan ortiq” yo‘l bosib o‘tganini e’lon qildi. Bu zamonaviy elektromobillarning o‘rtacha ko‘rsatkichidan ikki barobarga ko‘p.
Germaniyaning Zindelfingen shahridan Fransiyaning Kassis shahrigacha bo‘lgan 1008 kilometrli safar 12 soat vaqtni olgan. O‘rtacha tezlik soatiga 87,4 kilometrni, maksimal tezlik esa 140 kilometr/soatni tashkil etgan. Har 100 kilometrga o‘rtacha 8,7 kilovatt/soat energiya sarflangan.
Finishga yetib kelgan avtomobilning 15 foiz quvvati qolgan, bu yana 140 kilometr masofa uchun yetarlidir. Natijalar TÜV Süd mustaqil eksperti tomonidan qayd etib borilgan.
Ta’kidlanishicha, avtomobilning aerodinamik kuzov shakli va yengil konstruksiya (1755 kilogramm) energiya tejashga yordam bergan. Shuningdek, “favqulodda past” qarshilikka ega maxsus shinalar (Bridgestone) quvvatni saqlab qolgan. Kompaniyadagilarning so‘zlariga ko‘ra, avtomobil tog‘ dovoni va turli ob-havo sharoitini (yomg‘ir, shamol) bosib o‘tgan.
Taqqoslash uchun, Tesla Model S bir marta quvvatlanish orqali 637 kilometr, BMW IX xDrive50 esa 630 kilometr yo‘l bosa oladi. Elektromobil chakana savdoga 2022-yilning ikkinchi choragida chiqadi.
Eslatib o‘tamiz, 2021-yilning noyabrida Volkswagen ID.4 bitta mamlakat hududida eng uzoq sayohatni amalga oshirgan elektrokar sifatida rekord o‘rnatgandi.
Izoh (0)