Global NCAP xalqaro tashkiloti navbatdagi krash-testlar seriyasini o‘tkazdi. Bu safar mutaxassislar Hindiston bozori uchun tayyorlangan bazaviy Hyundai Creta’ni mustahkamlik sinovidan o‘tkazgan. Krossoverning mazkur versiyasi konstruksiya jihatidan Rossiya bozori uchun chiqarilgan variantga o‘xshash. Ekspertlar old yo‘lovchilar, shuningdek, bolalarning xavfsizligi yetarlicha ta’minlanmaganini qayd etdi, deb xabar beradi Motor.
Krash-testlar davomida Hyundai Creta soatiga 64 kilometr tezlikda deformatsiyalanuvchi 40 foizli qoplamaga ega to‘siq bilan to‘qnashgan. Sinovlar uchun krossoverning frontal xavfsizlik yostiqchalari, kamar taranglashtirgich va ABS tizimi bilan jihozlangan bazaviy versiyasi tanlangan. Zarba oqibatida avtomobilning motor bo‘lmasi jiddiy deformatsiyaga uchragan. “Ayrbaglar” ishlaganiga qaramay, mutaxassislar old yo‘lovchilarga jiddiy yuklama tushganini qayd etgan. Haydovchi rolini bajargan maneken ko‘krak qafasi, oyoq va sonidan jarohat olgan. Shu bilan birga, bosh va ko‘krak qismi xavfsiz qolgan.
Mashinaning orqa o‘rindig‘idagi maxsus kresloga qotirilgan bir yarim va uch yoshli “bolalar”ga ham yuklama tushgan. Kichik maneken yetarlicha himoyalangan bo‘lsa, kattaroq “bola”ning xavfsizligiga ekspertlar qoniqarsiz baho qo‘ygan. Sinovlar natijasiga ko‘ra, Creta’ning bazaviy modifikatsiyasi orqa yo‘lovchilar uchun 49 balldan 28,29 ball, old yo‘lovchilar uchun esa 17 dan 8 ball to‘plagan.
Bundan oldin Toyota krossoveri krash-testlardan a’lo darajada o‘tgani, Tesla Model 3 velosipedchi bilan to‘qnashuvning oldini olish testidan o‘ta olmagani to‘g‘risida xabar berilgandi.
Izoh (0)