“Barselona” yetakchisi Pedri jiddiy jarohat oldi va mavsumning qolgan qismini o‘tkazib yuboradi

“Barselona” yarim himoyachisi Pedri yana jarohat oldi.

19 yoshli futbolchi “Ayntraxt”ga qarshi kechgan uchrashuvda (2:3) son orti mushaklarida og‘riq his qilgani uchun zaxiraga olingandi.  “Barselona” matbuot xizmatining ma’lum qilishicha, Pedrining son mushaklarida yorilish yuzaga kelgan.

Diario Sport’ga ko‘ra, uning tuzalishiga bir yarim oy kerak bo‘ladi. Shu tariqa futbolchi mavsumning qolgan qismida maydonga tusha olmaydi.

Eslatib o‘tamiz, futbolchi birinchi davraning ham katta qismini jarohat sabab o‘tkazib yuborgan edi. Pedri yanvar oyida maydonga qaytgandi.

Ispaniyalik futbolchi 2021/22-yilgi mavsum La Ligada 12 ta o‘yinda ishtirok etib, 3 ta gol va bitta golli uzatmaga mualliflik qildi.