“Aybdorlar so‘zsiz javobgarlikka tortiladi”. Shavkat Mirziyoyev byurokratiya va korrupsiyaga yo‘l qo‘yganlar kechirilmasligini ma’lum qildi

Shavkat Mirziyoyev 15-aprel kuni bo‘lib o‘tgan yig‘ilish yakunida ajratilayotgan mablag‘larni kerakli loyihalarga yo‘naltirish zarurligi haqida gapirib o‘tdi. Bu haqda Prezident matbuot kotibi xabar qildi.

Yig‘ilish ishtirokchilarining e’tiborini yana bir muhim masalaga qaratmoqchiman.

Bugungi selektor doirasida tadbirkorlik uchun juda katta kredit mablag‘lar — qo‘shimcha 500 million dollar ajratilmoqda. Nima uchun? Chunki, qanchalik qiyin bo‘lmasin, hozirgi murakkab vaziyatda xalqimiz farovonligini, davlatimizning barqaror rivojlanishini o‘ylashimiz shart. Ajratiladigan har bir dollar, har bir so‘m budjetdanmi, bankdanmi — bu hammasi xalqning puli. Mablag‘lar faqat va faqat o‘zini oqlaydigan, odamlarning daromadini oshiradigan va ish o‘rinlari yaratadigan loyihalarga yo‘naltirilishi kerak.

Viloyat, tuman va shahar hokimlari, iqtisodiy va investitsiya komplekslari tarkibiga kiruvchi idoralar, ayniqsa soliq, bank, infratuzilmaga javob beradigan idora rahbarlarini qat’iy ogohlantirmoqchiman. Ushbu rahbarlar tadbirkorning har bir loyihasini amalga oshirishga shaxsan mas’ul va javobgar bo‘ladi. Byurokratiya va korrupsiyaga yo‘l qo‘yganlar kechirilmaydi, aybdorlar so‘zsiz javobgarlikka tortiladi”, — deydi prezident yig‘ilish yakunida.