Haydovchining ogohlantirishiga qaramay xavfsizlik kamari taqmagan old o‘rindiqdagi yo‘lovchi jarimaga tortilishi mumkin. Bu haqda 15-aprel kuni bo‘lib o‘tgan davra suhbatida Ichki ishlar vazirligi Jamoat xavfsizligi departamenti Yo‘l harakati xavfsizligi xizmati (IIV JXD YHXX) boshlig‘i o‘rinbosari Erali Bozorov ma’lum qildi, deya xabar bermoqda “Daryo” muxbiri.
Erali Bozorovning aytishicha, haydovchi yo‘lovchini kamar taqishini aytib ogohlantirishi zarur.
“Haydovchi majburiyatlarida belgilanganki, u avtomobil old o‘rindig‘idagi yo‘lovchiga kamar taqishini aytib ogohlantirishi kerak. Hozirda ‘Ma’muriy javobgarlik to‘g‘risida’gi kodeksga o‘zgartirishlar kiritilmoqda. Unga ko‘ra, agar haydovchi yo‘lovchini kamar taqishi kerakligi to‘g‘risida ogohlantirgan bo‘lsa-yu, u buni bajarmasa, yo‘lovchiga nisbatan jarima qo‘llanadi”, — dedi tashkilot rasmiysi.
Muloqotda IIV JXD YHXX bo‘lim boshlig‘i Murod Sheraliyev hukumatning 12-aprelda yangi tahrirda qabul qilingan “Yo‘l harakati qoidalarini tasdiqlash to‘g‘risida”gi qarori bilan xavfsizlik kamari taqmasligiga ruxsat berilgan shaxslar masalasiga to‘xtaldi.
“Qaror asosida avtomobil old o‘rindig‘ida o‘tirgan xomilador ayollar va bemorlarga xavfsizlik kamari taqmaslikka ruxsat berilgan. Ammo orqa o‘rindiq bo‘sh bo‘lsa, bemorni o‘sha yerga o‘tkazish kerak. Agar bemor old o‘rindiqda o‘tirgan bo‘lsa, yo‘l-patrul xizmati xodimi undan tibbiy ma’lumotnoma talab qilishi mumkin. Bemor o‘zining kasalligini isbotlash uchun bundan boshqa chora yo‘q. Hozirdan bunday talab qo‘yilmasa, hamma fuqarolar mashina oldiga o‘tirvolib, ‘men kasalman’, deb bahona qilishlari mumkin. Yana kamar taqmaslik, yo‘l harakati qoidalariga bo‘ysunmaslik boshlanadi”, — dedi boshqarma vakili.
Erali Bozorov bunga qo‘shimcha ravishda qanday turdagi bemorlarga old o‘rindiqda o‘tirsa-da, xavfsizlik kamari taqmaslikka ruxsat berilishini aytdi.
“Yo‘l harakati qoidalarini ishlab chiqishda Sog‘liqni saqlash vazirligi mutaxassislari ham ishtirok etdi. Vazirlik tomonidan 8 ta kasallik ro‘yxati keltirilgan bo‘lib, ulardan biri bilan og‘riganlarga xavfsizlik kamari taqmaslikka ruxsat beriladi. Xususan, O‘mrov va to‘sh suyaklari, yelka kamari singan (gipsda bo‘lsa), o‘pka surunkali kasalliklarining 4-bosqichidagi bemorlarga, bronxial astma, o‘pkaning jiddiy zararlanishi, o‘pkaning bir qismi olib tashlangan bo‘lsa, surunkali yurak yetishmaligining 3-bosqichidagi kasallarga va xomilador ayyollarga xavfsizlik kamari taqmaslikka ruxsat beriladi”, — dedi u.
Davra suhbatida ta’kidlanishicha, 2022-yilning 1-may kunidan e’tiboran haydovchilar 7—12 yoshli bolalarni maxsus o‘rindiqlarda tashishlari kerak. Bu yoshdagi bolalarga muxsus kichraytirilgan kamar taqishlari tavsiyaviy norma sifvatida kiritilgan (majburiy emas).
Avvalroq O‘zbekistonda transport vositasi haydovchisi va uning oldidagi yo‘lovchiga xavfsizlik kamarini taqish majburiy tartibda belgilangani xabar qilingandi.
Izoh (0)