Qirg‘iziston prezidenti Sadir Japarov 14-aprel kuni O‘zbekiston bosh vaziri o‘rinbosari — investitsiyalar va tashqi savdo vaziri Sardor Umurzoqovni qabul qildi. Bu haqda qo‘shni davlat prezident matbuot xizmati xabar qildi.
Qayd etilishicha, Japarov O‘zbekiston Qirg‘izistonning juda muhim tashqi siyosati va strategik hamkori ekanini tasdiqlagan. Ikki davrlar o‘rtasidagi munosabatlar va ko‘p qirrali hamkorlikni har tomonlama rivojlantirish tarafdori ekanini ta’kidlagan.
Uchrashuvda ma’lum qilishicha, Shavkat Mirziyoyev may oyida Qirg‘izistonga javob tashrifini amalga oshiradi.
Shuningdek, Sadir Japarov O‘zbekiston—Qirg‘iziston taraqqiyot jamg‘armasining ochilishini qutlab, uning faoliyati ikki davlat tadbirkorlari o‘rtasidagi savdo va sarmoyaviy aloqalarni kengaytirishga ko‘maklashishini tilagan. U jamg‘arma ikki qardosh davlat o‘rtasidagi savdo-iqtisodiy hamkorlikni kengaytirish uchun yangi imkoniyatlar ochishini ta’kidlagan.
Eslatib o‘tamiz, 11-mart kuni Shavkat Mirziyoyev Qirg‘iziston prezidenti Sadir Japarovni qabul qilgandi. Uchrashuvda 2017-yil 5-sentabrda imzolangan O‘zbekiston–Qirg‘iziston davlat chegarasi to‘g‘risida shartnomaning tarixiy ahamiyati qayd etilib, mazkur chegaraning qolgan qismlarini ham delimitatsiya qilish maqsadida Hukumatlararo komissiyaga muzokaralarni faollashtirish bo‘yicha ko‘rsatma berilgan.
Izoh (0)