Rossiya Mudofaa vazirligi Ukraina Qurolli kuchlari Rossiyada qo‘poruvchilik harakatlarini davom ettiraversa, mamlakatning “qarorlar qabul qilinayotgan markazlari”, jumladan, Kiyevga zarba berishini ma’lum qildi. Bu haqda idoraning rasmiy vakili Igor Konashenkovga tayanib, “Interfaks” xabar berdi.
“Ukraina qo‘shinlari tomonidan Rossiya hududidagi obyektlarga zarba berish va qo‘poruvchilik harakatlarini amalga oshirishga urinishlar bo‘layotganini ko‘ryapmiz. Agarda bu kabi holatlar davom etsa, Rossiya Qurolli kuchlari tomonidan qarorlar qabul qiluvchi markazlarga, jumladan, Kiyevga zarba beriladi. Rossiya armiyasi shu kunga qadar buni amalga oshirishdan tiyilib kelmoqda”, — deydi Konashenkov.
1-aprel kuni ertalab Rossiyaning Belgorod viloyatida “Rosneft”ga qarashli neft bazasi yonib ketgandi. Belgorod viloyat gubernatori Vyacheslav Gladkovning so‘zlariga ko‘ra, “Rossiya hududiga Ukraina Qurolli kuchlarining past balandlikda kirgan ikki vertolyotidan” neft bazasiga aviazarba berilgan. Rossiya Mudofaa vazirligiga ko‘ra, hujum Ukrainaning Mi-24 vertolyotlari yordamida amalga oshirilgan. Ukraina tomoni bunga aloqadorligini rad etgan.
13-aprel kuni Kursk viloyatida rossiyalik chegarachilar “Ukraina tomonidan” o‘qqa tutilgani aytildi. Viloyat gubernatori Roman Starovoytning so‘zlariga ko‘ra, Rossiya tomonidan qurbonlar yo‘q.
Avvalroq Rossiya Mudofaa vazirligi Mariupolda Ukrainaning 1026 nafar dengiz piyodasi taslim bo‘lganini ma’lum qilgandi.
Izoh (0)