Qashqadaryo viloyatining Chiroqchi tumanida YPX xodimining qonuniy talablariga bo‘ysunmagan haydovchi va yo‘lovchiga chora ko‘rildi, deb xabar beradi Yo‘l harakati xavfsizligi xizmati.
Ma’lum qilinishicha, 31-mart kuni Chiroqchi tumanida YPX xodimi Nexia rusumli avtomobil haydovchisiga to‘xtash ishorasini ko‘rsatganda, haydovchi to‘xtamasdan harakatlangan. Biroz vaqt o‘tib, ushbu avtomobilda bo‘lgan yo‘lovchi YPX xodimining yoniga kelib, sababsiz e’tirozlar bildirib janjallashgan.
Xodim haydovchining qoidabuzarligi bo‘yicha uchinchi shaxsga batafsil axborot berishga majbur emasligini bildirganda, ushbu fuqaro turli noo‘rin so‘zlar bilan ziddiyatli vaziyatni yuzaga keltirgan.
Holat bo‘yicha YPX xodimi tomonidan bildirgi orqali Yo‘l harakati xavfsizligi boshqarmasi boshlig‘iga ma’lum qilingan.
To‘plangan tegishli hujjatlar 8-aprel kuni Jinoyat ishlari bo‘yicha Chiroqchi tumani sudi tomonidan o‘rganilib, bo‘ysunmasdan harakatlangan haydovchiga BHMning uch baravari (810 ming so‘m) miqdorida jarima jazosi belgilangan. Shuningdek, YPX xodimining yoniga kelib sababsiz e’tirozlar bildirib, janjallashgan 37 yoshli fuqaroga nisbatan 10 sutka ma’muriy qamoq jazosi tayinlangan.
Avvalroq Qashqadaryoda yo‘llardagi qoidabuzarliklarni nazorat qilishga kelgan samarqandlik YPX xodimining o‘zi qoida buzgani, bloger talabi bilan unga ma’muriy bayonnoma tuzilgani to‘g‘risida xabar berilgandi.
Izoh (0)