Farg‘ona tumanida fermer xo‘jaligi yer maydonini sotib yuborgan sobiq kadastr xodimi va uning sherigiga jinoyat ishi qo‘zg‘atildi, deb xabar beradi Bosh prokuratura huzuridagi departament.
Ma’lum qilinishicha, departamentning Farg‘ona tuman bo‘limi tomonidan tergovga qadar tekshiruv o‘tkazilgan. Tekshiruv davomida Kadastr agentligining Farg‘ona tumani filiali mutaxassisi S.O. filialning sobiq xodimi, muqaddam Jinoyat kodeksining 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan sudlangan G.R. bilan oldindan til biriktirib, fermer xo‘jaligiga tegishli yerni sotib yuborgani aniqlangan.
Ular “A.O.” fermer xo‘jaligining 1,5 gektar ochiq yer maydonining 18 sotixida go‘yoki ikkita 9 sotixli uy-joy mavjudligi haqida soxta kadastr hujjatlarini tayyorlagan va ushbu 18 sotix yer maydonini fuqaro Sh.ga firibgarlik yo‘li bilan 7,5 ming dollarga sotgan. Tekshiruv davomida S.O va G.R. tomonidan 200 dollar qaytargani protsessual tartibda rasmiylashtirilgan.
Mazkur holat yuzasidan Jinoyat kodeksining 168-moddasi (firibgarlik) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Samarqandda 10 gektar yerni 7,5 ming dollar evaziga tanishlari orqali rasmiylashtirib berishni va’da qilgan shaxs ushlangani, Andijonda temiryo‘l stansiyasi boshlig‘i aka-ukaga yer olib berish uchun 8 ming dollar olgani, Urgutda ijara olingan 90 sotix yerni 60 ming dollarga sotishga uringan shaxs qo‘lga olingani to‘g‘risida xabar berilgandi.
Mavzuga doir:
Izoh (0)