“Uchrashuvda prezidentga arz qilmaganimdan pushaymonman”. Samarqandlik tadbirkor xususiy mulki noqonuniy buzilganini aytmoqda

Samarqand viloyatining Samarqand shahrida tadbirkorga tegishli bo‘lgan mulk — noturar joy binosi hech qanday asossiz buzib tashlangani aytilmoqda. Bu haqda ko‘plab mas’ullarga murojaat qilgan tadbirkor natijaga erishmayotganini, davlat rahbarining viloyatga tashrifi chog‘ida uchrashgan bo‘lsa-da, muammoni aytmaganidan afsusda ekanini bildirmoqda.

Ma’lum bo‘lishicha, Fuqarolik ishlari bo‘yicha Samarqand shahar sudi shahar hokimligi topshirig‘i bilan shahar Obodonlashtirish boshqarmasi tomonidan 2021-yilning sentabr oyida buzib tashlangan noturar joy binosini davlat va jamoat ehtiyojlari uchun olib qo‘yish to‘g‘risidagi ishni ko‘rib chiqmoqda. “Daryo” muxbiri mazkur voqea tafsilotlarini o‘rgandi.

“Ezgulik” jamiyati bilan hamkorlikda o‘tkazilgan surishtiruvda fuqaro Shahzod Rashidovga tegishli “Istiqbol” ko‘chasi 2-A uydagi yer maydonining davlat va jamoat ehtiyojlari uchun olib qo‘yilishi hamda ushbu xususiy mulk maqomidagi bino-inshootining buzib tashlanishi uchun hech qanday asos mavjud emasligi aniqlangan.

Fuqarolik ishlari bo‘yicha Samarqand shahar sudi raisi To‘lqin Usmonov tomonidan 2021-yilning 20-sentabr kuni chiqarilgan hal qiluv qarorida mulkni davlat va jamiyat ehtiyojlari uchun olib qo‘yish haqida qaror qilingan. Ammo muhokama jarayoniga xususiy mulk egasi Shahzod Rashidov chaqirilmagan. Sudya xususiy mulkning buzilishiga prezidentning “Samarqand shahrida tramvay liniyalari qurilishi loyihasini amalga oshirish chora-tadbirlari to‘g‘risida”gi qaroriga muvofiq “O‘zbekiston temir yo‘llari” AJ tomonidan Samarqanddagi tramvay yo‘lining Temiryo‘l vokzali hududidan “Siyob” dehqon bozorigacha yo‘nalishida qurilish ishlari amalga oshirilishi belgilanganligi hamda shahar hokimining 2017-yil 21-iyundagi “Samarqand shahridagi ikkinchi bosqich tramvay liniyasi qurilishi munosabati bilan Rudakiy ko‘chasida joylashgan turar joy binolarni buzishga ruxsat berish to‘g‘risida”gi qarorini asos sifatida keltirgan.

“O‘zbekiston temir yo‘llari” AJ Kapital qurilish direksiyasi boshlig‘i o‘rinbosari A.Qodirovning O‘zbekiston inson huquqlari “Ezgulik” jamiyati so‘roviga javoban 2022-yil 5-aprelda bergan ma’lumotiga ko‘ra, “O‘zbekiston temir yo‘llari” AJ Yo‘l xo‘jaligi boshqarmasi Samarqand shahridagi tramvay liniyasi qurilishida bosh pudratchi sifatida ishtirok etgan. Qurilish 2018-yilda tugallangan bo‘lib, ishchi guruh dalolatnomasi tasdiqlangan va foydalanishga topshirilgan.

Javob xatiga ilova qilingan dalolatnomadan ma’lum bo‘lishicha, tramvay liniyani qurish ishlari allaqachon tugallangan bo‘lib, obyektni davlat qabul hay’atiga topshirish 2018-yilning 26-fevralida amalga oshirilgan. Uzunligi 11,4 km tramvay liniyasi ham to‘liq qurib bitkazilgan. Shuningdek, shahar hokimining 2017-yil 21-iyundagi qarorida ham na Shahzod Rashidov ismini va na “Istiqbol” ko‘chasi nomini o‘qish mumkin. Shu sabab sudyaning o‘sha paytdagi qarori bekor qilinib, holat qayta ko‘rib chiqilmoqda.

Mazkur holatga munosabat bildirgan viloyat hokimligi axborot xizmati rahbari tadbirkorning buzib tashlangan mulki o‘rnida Rudakiy haykali qad rostlashini aytmoqda.

“Viloyat hokimligi Tojik madaniy markazi vakillari, olimlar va jamoatchi faollar bilan maslahatlashgan holda ko‘cha boshida fors-tojik adabiyotining asoschisi Rudakiy haykalini o‘rnatish tashabbusini ilgari surdi. Mazkur qurilish uchun viloyat hokimligi injiniring kompaniyasi nazorati ostida ‘Yakhyayev proekt servis’ MCHJ tomonidan loyiha ham ishlab chiqildi. Loyiha shaharsozlik kengashida kengash a’zolari tomonidan muhokama etilib, tasdiqlandi. Homiylik mablag‘lari evaziga qurilish ishlari amalga oshirilmoqda. Qurilish osti maydoni bilan bog‘liq masala esa sud tartibida ko‘rib chiqilgan va qaror asosida ijro harakati mas’ul idora tomonidan amalga oshirilgan. Sud qarorda ko‘rsatilgan mablag‘ ajratilib bo‘lingach, qurilish boshlangan”, — deydi viloyat hokimligi axborot xizmati rahbari Manuchehr Mirzayev.

Manuchehr Mirzayev bergan ma’lumot “Istiqbol” ko‘chasidagi 2-A uyning buzilishi Samarqandda tramvay qurilishi emas balki viloyat hokimligi tomonidan ilgari surilgan Rudakiy haykali sabab buzilgan bo‘lishi mumkin degan taxminni yuzaga keltiradi. Biroq, viloyat hokimligi injiniring kompaniyasi direktori A.Elmurodov mazkur qurilishga injiniring kompaniyasining hech qanday aloqasi yo‘qligini, “Yakhyayev proekt servis” MCHJ tomonidan ishlab chiqilgan loyihaga ham ularning daxli yo‘qligini aytayotgani yana chalkashliklarga olib keladi.

O‘zboshimchalik bilan buzilgan mulk egasining otasi — tadbirkor Shokir Rashidovning bildirishicha, u oilaviy mulkining noqonuniy buzib tashlanganligi bo‘yicha 2022-yilning fevralida Samarqandga tashrif buyurgan O‘zbekiston prezidenti Shavkat Mirziyoyevga arz qilmoqchi bo‘lgan. Ammo ushbu masalaning qonuniy to‘xtamga kelishiga umid qilib, shikoyat qilmagan.

“Noqonuniy buzilgan mulkim bo‘yicha prezidentga tadbirkorlar uchrashuvi davomida arz qilmadim va bundan pushaymonman. Prezidentdan boshqa hech kim bizga yordam bermayapti va tadbirkorlar uchun jon kuydiradigan boshqa odamni ko‘rmadim”, — deydi Shokir Rashidov.