“Kalmar o‘yini” serialining muallifi Xvan Don-Xyok tomoshabinlar Netflix’ning butun dunyoda mashhurlikka erishgan serialining navbatdagi qismlarida qaysi aktyorlarni kutishi mumkinligi to‘g‘risida ma’lumot berdi, deb yozadi “Film.ru”.
Li Jon Je (sinovlarda g‘olib chiqqan bosh qahramon Son Ki Xun) va boshqaruvchi (Li Byon Xon) o‘z rollariga qaytadi.
Avvalroq Xvan Don Xyok aktrisa va model Chon Xo Yon serialda suratga tushishni davom etishi mumkinligini ma’lum qilgandi. Qahramonining o‘limiga qaramay, u egizak-singlisi rolini ijro etishi mumkin.
Serialning davomi qachon taqdim etilishi ma’lum emas. Taxminlarga ko‘ra, ikkinchi mavsum 2024-yilda ekranlarga chiqadi.
Eslatib o‘tamiz, “Kalmar o‘yini” seriali 2021-yilning sentabr oyida namoyish etildi. Sujet quyidagicha: 456 nafar moliyaviy muammoga duch kelganlar ko‘p millionli sovrin yutib olish umidida sirli o‘yinda ishtirok etadi. Ammo bolalar o‘yiniga o‘xshab ko‘ringan sinovlar halokatli bo‘lib chiqadi: har kuni eng kuchsiz o‘yinchilar tashkilotchilar tomonidan ayovsiz tarzda o‘ldiriladi. Ushbu drama bir zumda tomoshabinlar va tanqidchilarning minglab hayratlanarli izohlariga sabab bo‘ldi va Netflix’da eng ko‘p tomosha qilingan serial sifatida “Brijertonlar” rekordini yangiladi.
Izoh (0)