Samarqand viloyati IIB JQB hamda DXXning viloyat boshqarmasi xodimlari hamkorligida o‘tkazilgan tezkor tadbirda yer sotish bilan bog‘liq holatga chek qo‘yildi. Bu haqda Samarqand viloyati IIB axborot xizmati xabar berdi.
Ma’lum qilinishicha, Bulung‘ur tumanida o‘tkazilgan tezkor tadbirda Samarqand shahrida yashovchi 38 yoshli Z.G‘. mahalliy fuqaroga tuman hokimligi zaxirasidagi 10 gektar yer maydoniga egalik qilish uchun o‘tkaziladigan auksionda g‘olib bo‘lishni hamda ushbu yer maydonini uning nomiga mansabdor tanishlari orqali rasmiylashtirib berishni va’da qilgan. Ushbu shaxs xizmati uchun 7,5 ming dollarni olgan vaqtida ashyoviy dalillar bilan ushlangan.
Hozirda fuqaro Z.G‘.ga nisbatan Jinoyat kodeksining 168-moddasi (firibgarlik) 3-qismi “a” bandi va 211-moddasi (pora berish) 2-qismi “b” bandi bilan jinoyat ishi qo‘zg‘atilib, tergov harakatlari olib borilmoqda.
Avvalroq Samarqandda 1 gektar yerni 430 ming dollarga sotishga uringan shaxslar qo‘lga olingani, Andijonda temiryo‘l stansiyasi boshlig‘i aka-ukaga yer olib berish uchun 8 ming dollar olgani, Toshkentda 2 gektar yerni 800 ming dollarga sotishga uringan shaxs ushlangani to‘g‘risida xabar berilgandi.
Mavzuga doir:
Izoh (0)