Uill Smit “Oskar” marosimidagi boshlovchi Kris Rokka tushirgan tarsakisi uchun Amerika Kino akademiyasi shunday munosabat bildirdi, deb yozadi Esquire.
Kino san’ati va fanlari akademiyasi aktyor Uill Smitni o‘z tadbirlarida, jumladan, “Oskar” mukofotini topshirish marosimidan 10 yilga chetlatdi.
Taqiq 2022-yil 8-apreldan kuchga kirdi. 2032-yilgacha aktyorga nafaqat AQSH Kino akademiyasining tadbirlariga kelishi taqiqlangan, balki tadbirlarda masofaviy ham ishtirok eta olmaydi. Ammo Uill Smit “Oskar”ga ehtimoliy nomzod va g‘oliblik huquqini saqlab qoladi.
Kino san’ati va fanlari akademiyasi direktorlar kengashi bu qarorga Smit boshlovchi Kris Rokka uning rafiqasi — aktrisa Jada Pinkett-Smitga qilgan noo‘rin hazili tufayli tushirgan tarsakisidan so‘ng keldi. Shuningdek, tashkilot Kris Rokdan uzr so‘radi va unga “xotirjamlikni saqlagani” uchun minnatdorlik bildirdi.
“Men akademiya qarorini qabul qilaman va hurmat qilaman”, — dedi Uill Smit. Aytgancha, u avvalroq Kris Rok va “Oskar”ning barcha tashkilotchilaridan uzr so‘ragan. Aktyor o‘zining xatti-harakati qabul qilib bo‘lmaydigan va kechirilmas deb tan olgan. Shuningdek, aktyor Kino san’ati va fanlari akademiyasidan iste’foga chiqqan.
Bundan tashqari, “Oskar”dagi janjaldan so‘ng Netflix va Apple Smit haqida biografik film suratga olishdan bosh tortdi. Netflix aktyor bilan jangovar film ustida ishlashni to‘xtatdi.
Eslatib o‘tamiz, 2022-yil Uill “Qirol Richard” filmidagi roli uchun “Eng yaxshi aktyor” nominatsiyasi bo‘yicha “Oskar”ni qo‘lga kiritgan edi.
Izoh (0)