UzAuto Motors’ning O‘zbekistondagi IPO’si 2022-yil 1-avgustgacha o‘tkazilishi kerak. Bu prezident farmoni bilan tasdiqlangan.
Ushbu sanagacha kompaniyaning 10% gacha aksiyalari mahalliy fond birjasiga joylashtirilishi kerak. Bundan tashqari, yana bir IPO xalqaro birjada o‘tkazilishi kutilmoqda.
IPO (Initial Public Offering) — birlamchi ommaviy taklif, aksiyalarni fond bozori orqali sotish jarayoni. Bu korxona uchun nafaqat pul jalb qilish, balki yangi bosqichga ko‘tarilib, ommaviy va shaffof bo‘lish yo‘lidir. IPO’dan keyin deyarli barcha narsa o‘zgaradi — hisobot shakllaridan tortib rivojlanish rejalarigacha.
UzAuto Motors’ning IPO bilan bog‘liq rejalari birinchi marta 2020-yil boshida ma’lum bo‘lgandi. Kompaniya o‘shanda tayyorgarlik jarayoni, taxminan, 1,5-2 yil davom etishini aytgan. Aksiyalarni mahalliy va eng yirik xalqaro fond birjalariga joylashtirish rejalashtirilgani haqida xabar berilgandi.
Hozirda kompaniyaning yagona egasi davlat hisoblanadi — UzAuto Motors 100 foiz “Uzavtosanoat” aksiyadorlik jamiyatiga tegishli, u esa o‘z navbatida 100 foiz Davlat aktivlarini boshqarish agentligi ixtiyorida.
Avvalroq O‘zbekistonda IPO’da kimlar va qanday qilib kompaniya aksiyalarini sotib olishi mumkinligi haqida xabar berilgan edi.
Izoh (0)