Psixologik treninglardan ham ko‘proq foyda beruvchi 8 ajoyib film

Turli xil hayotiy vaziyatlarga boshqacha nigoh bilan qarashni xohlaysizmi? U holda qulayroq joylashing va popkorndan ko‘proq g‘amlab oling.

“Boshdan oyoq sohibjamol”

AQSH, Xitoy, 2018 yil

Janr: melodrama, komediya

Rejissor: Ebbi Kon, Mark Silvershteyn

Rollarda: Emi Shumer, Mishel Uilyams, Tom Xopper

Nozik qomatni orzu qiladigan yoqimtoy, do‘mboqqina qizning hayoti bir zumda ostin-ustun bo‘lib ketadi. Ozishni xohlovchi beso‘naqay qahramon tasodifan velotrenajyordan yiqilib, boshini qattiq urib oladi. Hushiga kelgan qiz birdaniga ideal qomatga ega haqiqiy sohibjamol ekanligini tushunadi. O‘zining chidab bo‘lmas darajada go‘zalligiga ishonch hosil qilgan bosh qahramon hayotini tubdan o‘zgartira boshlaydi. Biroq boshqalarning nazarida u hali hamon o‘sha — semiz qiz. Ammo uning o‘z go‘zalligiga bo‘lgan ishonchi odamlarni jalb qila boshlaydi va qahramonimiz tez orada o‘zini diqqat markazida ko‘radi.

“Xarid vasvasasi”

AQSH, 2009-yil

Janr: melodrama, komediya

Rejissor: P.J.Xogan

Rollarda: Ayla Fisher, Xyu Densi, Kristen Ritter, Joan Kyusak

Bosh qahramon — so‘nggi urfda kiyinishga mukkasidan ketgan o‘ta zamonaviy qiz. Uning do‘konga har bir tashrifi yana biror narsa sotib olish va buning ortidan och qolmaslik istagi o‘rtasidagi haqiqiy kurashdir. Moliyaviy ahvolini nazorat qila olmasligiga qaramay, qizning o‘zi moliya bo‘limida jurnalist bo‘lib ishlaydi va odamlarga pullarini tejamkorlik bilan boshqarish bo‘yicha maslahatlar beradi.

“Imkonsizlik”

Ispaniya, Tailand, AQSH, 2012-yil

Janr: drama

Rejissor: Xuan Antonio Bayona

Asosiy rollarda: Naomi Uotts, Yuen Makgregor, Tom Xolland

Dramatik kartina Tailandda 2004-yildagi sunami paytida sodir bo‘lgan voqealar haqida hikoya qiladi. Bedarak yo‘qolganlarni hisobga olmaganda, sunami 200 mingdan ortiq odamning hayotiga zomin bo‘ldi. Dam olish maskaniga kelgan besh kishilik oilani ham tabiiy ofat chetlab o‘tmadi. Ularning har biri bir-biridan uzilib qolgan holda tezroq uchrashishdan umidini yo‘qotmaydi.

“Templ Grandin”

AQSH, 2010-yil

Janr: drama, biografiya

Rejissor: Mik Jekson

Rollarda: Kler Deyns, Julia Ormond, Devid Streteyrn, Ketrin O’Xara

Biografik film o‘zining fe’l-atvori va qat’iyati tufayli jahon tarixiga kirgan Templ Grandin ismli autizm kasalligiga chalingan ayolning ajoyib tarixini hikoya qiladi. Qishloq xo‘jaligi sohasidagi yetakchi olimlardan biriga aylangan Templ har qanday odam, uning kasallik tashxisi va cheklovlaridan qat’i nazar, ulkan muvaffaqiyatlarga qodir ekanligini isbotlay oladi.

“1+1”

Fransiya, 2011-yil

Janr: drama, komediya, biografiya

Rejissor: Olivier Nakache, Erik Toledano

Bosh rollarda: Fransua Klyuze, Omar Si, Ann Le Ni

Ta’sirli film xarakter jihatidan qarama-qarshi bo‘lib ko‘rinuvchi ikki kishining haqiqiy do‘stligi haqida hikoya qiladi. Boy va aristokrat Filipp umrining qolgan kunlarini nogironlar aravachasida o‘tkazishga majbur bo‘ladi. U o‘z hayotini osonlashtirish uchun yordamchi yollaydi — bu ish sobiq mahbus Driss uchun umuman mos emasdi. Ikkisini ham hayratda qoldirgani shuki, aynan Driss Filippning hayotga ijobiy qarashini tiklay oladi va unga sarguzasht ruhini kiritadi.

“Baxt ortidan quvib”

AQSH, 2006-yil

Janr: drama, biografiya

Rejissor: Gabriele Muchchino

Bosh rollarda: Uill Smit, Jeyden Smit, Tandiv Nyuton

Drama besh yoshli o‘g‘lini tarbiyalayotgan yolg‘iz ota haqida. Maoshdan maoshgacha zo‘rg‘a kun ko‘radigan bosh qahramon moliyaviy qiyinchiliklarga dosh berishi lozim. Bir safar kvartira ijarasini to‘lay olmagan qahramonlar uydan haydab yuboriladi. Endi ota farzandining kelajagini ta’minlash uchun qiyin yo‘lni bosib o‘tishi kerak.

“Pining hayoti”

AQSH, Tayvan, Buyuk Britaniya, 2012-yil

Janr: Fantastika, Drama, Sarguzasht

Rejissor: Eng Li

Rollarda: Suraj Sharma, Irfon Xon, Ayush Tandon

Rangli va jonli film hind hayvonot bog‘i direktorining o‘g‘li Pi haqida hikoya qiladi. Qahramonning oilasi ko‘chishga majbur bo‘ladi va yangi uyga ketayotib, kemada halokatga uchraydi. Pi hushiga kelgach, omon qolganini tushunadi va qayiqda suzib yuradi. Biroq uning qayiqdagi qo‘shnilari yo‘lbars, giyena, zebra va orangutan edi. Endi bola yovvoyi hayvonlar orasida omon qolishi kerak.

“Odamlardan yiroqda”

AQSH, 2000-yil

Janr: drama, romantika, sarguzasht

Rejissor: Robert Zemekis

Rollarda: Tom Xenks, Xelen Xant, Kris Not, Nik Sirsi

Oddiy bir mehnatkash kishining hayoti odatdagidek davom etayotgandi: tez orada sevgilisi bilan turmush quradi, ish va doimiy maishiy muammolar. Qahramonning navbatdagi xizmat safari uning hayotini butunlay o‘zgartirib yuboradi: samolyot to‘satdan qulab tushadi va birgina bosh qahramon omon qolishga muvaffaq bo‘ladi. O‘zini kimsasiz orolda ko‘rgan qahramon bir necha yil davomida har kuni omon qolish uchun kurashishi kerak bo‘ladi.