Farg‘ona viloyatining Uchko‘prik tumanida yashovchi 31 yoshli Gulasal Sobirova surunkali buyrak yetishmovchiligidan aziyat chekardi. Turmush o‘rtog‘ining hayotini saqlab qolish uchun Dilshod Sobirov xotiniga donorlik qildi. Bu haqda “Daryo” muxbiri Azizjon Ermatov xabar berdi.
Olti soatdan ortiq davom etgan jarrohlik amaliyoti muvaffaqiyatli o‘tgan bo‘lib, hozirda bemorlarning ahvoli yaxshi.
“Respublika shoshilinch tibbiy yordam ilmiy markazi Farg‘ona filialida ikki nafar bemorda ilk bor aorta–koronar shuntlash jarrohlik amaliyoti o‘tkazilgan edi. Bu safar esa poytaxtdan kelgan mutaxassislar — Respublika shoshilinch tibbiy yordam ilmiy markazining xirurgiya bo‘limi rahbari, tibbiyot fanlari doktori, professor Farhod Hojiboyev rahbarligidagi 12 kishilik guruh hamda markazning Farg‘ona filiali shifokorlari ishtirokida buyrak ko‘chirib o‘tkazish amaliyoti o‘tkazildi”, — deydi filial direktori Abduqayum To‘xtaqulov.
Viloyatda bugungi kunda surunkali buyrak yetishmovchiligi bilan og‘rigan bemorning 260 nafari doimiy ravishda gemodializator apparati orqali muolaja olmoqda. Hozirda oltmishga yaqin bemorlar buyrak ko‘chirish amaliyotini o‘tkazishga muhtoj.
Izoh (0)