“Paxtakor” standart vaziyatlarda xatoga yo‘l qo‘yishini bilardik. “Paxtakor” — “Sepahon” uchrashuvidan keyingi matbuot anjumani

Futbol bo‘yicha Osiyo Chempionlar Ligasi 1-turi doirasida kechgan “Paxtakor” — “Sepahon” uchrashuvidan (1:3) keyin har ikki murabbiy ishtirokida matbuot anjumani o‘tkazildi.

“Paxtakor” ustozi Slavche Voyneski qoniqarsiz natijani e’tiborni yo‘qotish bilan izohladi.

Bahsni ikkiga bo‘lgan bo‘lardim, birinchi bo‘limda o‘yinni nazorat qildik, gol urdik, yaxshi harakatlandik. Biroq ikkinchi bo‘limda standart holatlardan keyin ikki marta qo‘pol xato qildik va hisobda ortda qola boshladik. Keyin oldinga tashlanib, uchinchi golni o‘tkazdik.

Ruhiy va jismoniy tayyorgarlik yonma-yon yuradi. Xatolarni e’tiborni yo‘qotganimiz bilan izohlagan bo‘lardim. Bu bizga qimmatga tushdi. Yigitlar oxirigacha kurashdi, buning uchun ularga rahmat.

“At-Ta’vun”ga qarshi o‘yinda oson bo‘lmaydi. Guruhda barcha bellashuv og‘ir kechadi, buni o‘yindan oldin ham aytib o‘tgandim. Yaxshi saviyali jamoalar jamlangan guruhdan joy olganmiz.

Slavche Voyneski, “Paxtakor” bosh murabbiyi

“Sepahon” bosh murabbiyi Muharram Navidkiya hisob fors jamoasi foydasiga yana-da yirikroq ko‘rinish olishi mumkin bo‘lgani haqida gapirdi.

Jamoam bu o‘yinda haqli ravishda g‘alaba qozondi. Lekin ayrim faktlarni keltirib o‘tishim kerak. Misol uchun, birinchi bo‘limni juda yomon o‘tkazdik. Taktik tomondan ham o‘yinimiz ko‘ngildagidek chiqqani yo‘q. Ammo futbolchilar ikkinchi bo‘limda o‘ziga keldi va yaxshi harakat qildi. Bir qancha imkoniyatga ega bo‘ldi. Bundan ham yirikroq g‘alabaga erishishimiz mumkin edi. To‘pni ko‘proq nazorat qilib raqib yarim himoyasidagi bo‘shliqlarni ko‘rdik.

Navbatdagi o‘yinlarga qadar tezroq muammolarimizni hal qilib olishimiz darkor. Ya’ni yuqorida aytganimdek uchrashuvning dastlabki qismi borasida ishlashimiz zarur.

Uchrashuvga tayyorgarlik jarayonida jarima zarbalari ustida ishlaganimizni aytib o‘tishim kerak. Raqib ishtirokidagi o‘yinlarning videolarini kuzatish chog‘ida jarima zarbalari, standart vaziyatlarda xatolarga yo‘l qo‘yishini, bundan foydalanishimiz mumkinligini aytdim.

Muharram Navidkiya, “Sepahon” bosh murabbiyi

Eslatib o‘tamiz, OChL D guruhidagi o‘yinlar Saudiya Arabistonida markazlashgan tizimda o‘tkazilmoqda