“Bu sharmandalik va raqibga nisbatan haqorat”. “Budyo-Glimt” ustozi “Roma” darvozabonlar murabbiyiga hujum qilgani aytilmoqda

Lorenso Pellegrini “Budyo-Glimt” ustozi “Roma”ning darvozabonlar murabbiyiga hujum qilgani haqida aytib o‘tdi.

Voqea Norvegiya jamoasi bosh murabbiyi Kyetil Knutsen va rimliklar klubi murabbiylar shtabi a’zosi Nuno Gomes o‘rtasida sodir bo‘lgan.

Football Italia nashrining xabariga ko‘ra, Norvegiya politsiyasi Knutsen, Gomes va janjal guvohi bo‘lgan futbolchilarni so‘roq qilgan.

Ularning murabbiyi bizning darvozabonlar murabbiyiga tashlandi. Dastlab xunuk so‘zlarni ishlatib gapirdi, keyin esa murabbiyga hujum qildi.

Bu juda achinarli, chunki bunday xatti-harakatlar “Roma”ga, futbolchilar va xodimlarga nisbatan haqorat hisoblanadi. Bu uyat.

Ko‘rgan voqealarimdan hamon hayratdaman. Bu sharmandalik. Endi biz maydon tashqarisida bo‘lgan voqealar tufayli ham javob o‘yinida “Budyo Glimt”ni uyga jo‘natib yubormoqchimiz.

Lorenso Pellegrini, “Roma” futbolchisi

Qayd etib o‘tish kerak, rimliklar ushbu jamoa bilan bir guruhdan o‘rin olgandi. Joze Mourinyo shogirdlari bitta o‘yinda mag‘lubiyatga uchragan (6:1) bo‘lsa, yana bir o‘yinda durang (2:2) natija qayd etilgan. Tomonlarning javob bellashuvi 14-aprel sanasiga belgilangan.