“Chelsi” Chempionlar Ligasi chorak final dastlabki o‘yinida “Real”ga 1:3 hisobida mag‘lub bo‘ldi.
Londonliklar so‘nggi 2 o‘yinda o‘z darvozasidan 7 ta gol olib chiqdi. 2-aprel sanasida Tomas Tuxel shogirdlari APL doirasida “Brentford”ga qarshi o‘yinda 1:4 hisobida imkoniyatni boy bergandi. “Real” esa uch bora Eduar Mendi darvozasini ishg‘ol qildi.
“Aristokratlar” 2018-yil yanvar—fevral oyidan buyon 2 o‘yinda 7 ta gol o‘tkazib yubormagan edi. O‘shanda “Chelsi” Angliya chempionati doirasida “Bornmut” (0:3) va “Uotford”ga (1:4) mag‘lub bo‘lgandi. Londonliklarning keyingi o‘yini 9-aprel, shanba kuni “Sauthempton”ga qarshi bo‘lib o‘tadi.
“Chelsi” ilk bor “Real”ga mag‘lub bo‘ldi. Shuningdek, londonliklar ustozi Tomas Tuxelning ham Madrid klubiga qarshi mag‘lubiyatsiz seriyasi yakunlandi. Bunga qadar mutaxassis qo‘l ostidagi jamoalar olti o‘yinda “Real”ga yutqazmagandi (4 durang, 2 g‘alaba).
Chempionlar Ligasi doirasidagi o‘yinda ilk bor bir futbolchi “Chelsi” darvozasini uch bor ishg‘ol etdi. Benzemagacha hech qaysi futbolchi bu ishni uddalay olmagandi.
Izoh (0)