“Real” Eden Azarni ijaraga berib yuborishi mumkin

“Real” hujumkor yarim himoyachisi Eden Azar yozda Madrid jamoasini tark etishi mumkin.

AS nashrining xabariga ko‘ra, madridliklar futbolchining “Chelsi”dagi yillaridek yuqori formada bo‘lishini xohlaydi. Lekin Kilian Mbappe jamoaga olib kelinsa, Azar yetarlicha o‘yin amaliyotiga ega bo‘la olmaydi. Shuning uchun rahbariyat belgiyalikni ijaraga berib yubormoqchi.

Agar Eden boshqa jamoada ishonchli harakat qilsa, “Real” uning transferi borasida qaror qabul qiladi.

Shuningdek, ispan klubi maoshlarni qisqartishni istamoqda. 31 yoshli Azar yiliga 15 million yevro atrofida maosh oladi. Futbolchining maoshini to‘liq to‘lab berish sharti bilan ijaraga olishi mumkin bo‘lgan jamoalar kam bo‘lishi kutilmoqda.

Edenning o‘zi esa mundialga qadar formada bo‘lib turish uchun imkoniyat beradigan klubga o‘tishga harakat qilishi mumkin.

Avvalroq, belgiyalik futbolchi jarohati sabab mavsumning qolgan qismini o‘tkazib yuborishi haqida ma’lumot berilgandi. “Real” yozda deyarli 10 nafar futbolchisi bilan xayrlashmoqchi ekanligi, ularning orasida Eden Azar ham borligi xabar qilingandi.

Eden Azar 2021/22-yilgi mavsum La Ligada 17 ta o‘yinda maydonga tushib, bitta golli uzatmaga mualliflik qildi.