O‘g‘rilik qilgani sabab olti yil muddatga ozodlikdan mahrum qilinib, sud ajrimi bilan o‘talmay qolgan 3,5 yil muddatini Samarqanddagi manzil koloniyada o‘tayotgan shaxs Qashqadaryodagi xonadonlarga o‘g‘rilikka kirdi. Bu haqda viloyat IIB axborot xizmati xabar tarqatmoqda.
Ma’lum bo‘lishicha, 2022-yil 15-mart kuni soat 09:00 da Kitob tumani “Xalqlar do‘stligi” mahallasida yashovchi uy bekasi B.A. yashash uyiga notanish shaxs kirib, uyida bo‘lgan 250 ming so‘m puli va bir juft erkaklar oyoq kiyimini o‘g‘irlab ketganini bayon qilgan. Shu mahallada yashovchi T.B. hamda “Charmgar” mahallasida turuvchi P.Sh.lar 16-mart kuni IIBga murojaat qilib, noma’lum shaxslar xonadoniga kirib, buyumlarini titganini, deraza oynalarini sindirib, tartibsiz holatga keltirganini bildirgan. Shuningdek, “Hamid Olimjon” mahallasidagi nafaqaxo‘r ayol R.R. ham uyiga o‘g‘ri tushganidan shikoyat qilgan.
Mazkur holat yuzasidan olib borilgan tergovga qadar tekshiruvlar davomida hodisa joyidagi oyna siniqlari viloyat IIB EKBdagi biometrik identifikatsiya tizimida tekshirib ko‘rilganida barmoq izlari Kitob tumanining “Charmgar” ko‘chasida yashovchi, 2019-yilda o‘g‘rilik qilgani bois olti yil muddatga ozodlikdan mahrum qilinib, sudning 2022-yil 10-fevraldagi ajrimi bilan o‘talmay qolgan 3,5 jazo muddatini Samarqand viloyatining Payariq tumanida joylashgan 37-sonli manzil kaloniyasida o‘tayotgan R.J.ga tegishli ekani aniqlangan.
R.J. jazo o‘tayotgan vaqtda, ya’ni 2022-yil 15-mart kuni manzil kaloniyani ruxsatsiz tark etib, jinoiy rejasini amalga oshirish uchun Kitob tumaniga kelgan va yuqorida tilga olingan xonadonlarga o‘g‘rilikka kirgan.
Mazkur holat yuzasidan Kitob tuman IIB huzuridagi Tergov bo‘limi tomonidan jinoyat ishi qo‘zg‘atildi.
Izoh (0)