Buxoro viloyatida beshta maxsus radar moslamasi bilan jihozlangan avtomobil faoliyat ko‘rsata boshladi, deya xabar berdi “Daryo” muxbiri.
Viloyat YHXB inspektorlariga biriktirilgan, onlayn rejimda ishlovchi maxsus radar moslamali avtomobillar bir yo‘nalishda va qarama-qarshi yo‘nalishda harakatlanib kelayotgan, belgilangan tezlikka amal qilmagan avtomobillarni qayd etadi.
“Ushbu avtomobillardagi radarlar kecha-yu kunduz onlayn tarzda ishlaydi. Yurgan holatda transport vositalarining qoidabuzarligini aniqlab berishga moslashtirilgan harakatdagi bunday vositalar viloyatning beshta yirik yo‘nalishli yo‘llarida, jumladan, Buxoro shahar yo‘nalishi, Kogon shahar va Kogon tumanini o‘z ichiga olgan Qorovulbozor—Buxoro yo‘nalishi, Jondor—Qorako‘l—Olot yo‘nalishi, Buxoro tuman—Romitan—Peshko‘ yo‘nalishi, Vobkent—G‘ijduvon—Shofirkon yo‘nalishlarida xizmatga jalb etildi. Mazkur multiradarlar ko‘chma va qo‘zg‘almas radarlarga nopisand qaraydigan va aynan qoidabuzarlikni o‘zi uchun shior bilgan uchar haydovchilarning ham xatti-harakatlariga chek qo‘yadi. Shuningdek, og‘ir turdagi avtoavariyalarning oldini olishda ham xizmat qiladi”, — deydi Ulug‘bek Shukrullayev.Matbuot xizmati rahbari so‘ziga ko‘ra, bugungi kunda viloyatda 228 mingdan ortiq transport vositasi harakatlanadi. 2022-yilning o‘tgan davrida tezlik oshirish bilan bog‘liq 20 mingdan ortiq qoidabuzarlik holati qayd etilgan. Shulardan 1800 ga yaqin holatda haydovchilarning spirtli ichimlik iste’mol qilgan holda transport vositasini boshqargani ro‘yxatlashtirilgan. Qoidabuzarlik darajasiga qarab jarimalar undirilgan.
“Tezlikni oshirish bilan bog‘liq qoidabuzarliklar orqali haydovchilardan qancha miqdorda jarima undirilgani maxfiy sanaladi va bu raqamlarni oshkor eta olmayman”, — dedi Ulug‘bek Shukrullayev.
Izoh (0)