“Ayollar daftari”ga kiritilgan xotin-qizlarni qo‘llab-quvvatlash jamg‘armasi tashkil etildi

Vazirlar Mahkamasining “Xotin-qizlar muammolarini o‘rganish va hal etish tizimini yanada takomillashtirish chora-tadbirlari to‘g‘risida”gi qarori qabul qilindi, deb xabar beradi Norma.

Xotin-qizlarning ijtimoiy-iqtisodiy muammolarini hal etish maqsadida “ayollar daftari” ro‘yxatiga kiritilgan xotin-qizlarni qo‘llab-quvvatlash jamg‘armasi tashkil etildi.

Hujjat bilan quyidagilar tasdiqlangan:

• “Ayollar daftari”ni yuritish orqali xotin-qizlar muammolarini tizimli ravishda hal etish va ularni ijtimoiy qo‘llab-quvvatlash tartibi to‘g‘risidagi nizom;
• “Ayollar daftari” ro‘yxatiga kiritilgan xotin-qizlarni qo‘llab-quvvatlash jamg‘armalari to‘g‘risidagi nizom;
• Xotin-qizlar muammolarini tizimli ravishda hal etish, ularni ijtimoiy qo‘llab-quvvatlash bo‘yicha respublika komissiyasining tarkibi.

Oila va xotin-qizlar davlat qo‘mitasiga Axborot texnologiyalari va kommunikatsiyalarini rivojlantirish vazirligi bilan birgalikda 2022-yil 1-iyulga qadar “Ayollar daftari” bilan ishlash elektron tizimini ishlab chiqish va ishga tushirish topshirilgan.

Elektron tizim Davlat maqsadli jamg‘armasi hisobidan moliyalashtiriladi. Ushbu tizim yordamida quyidagi imkoniyatlar beriladi:

• ijtimoiy-himoyaga muhtoj xotin-qizning “ayollar daftari”ga kiritish haqidagi murojaatini bevosita qabul qilish;
• ushbu murojaatni ko‘rib chiqish natijalari, agarda murojaatni qanoatlantirish rad etilgan bo‘lsa, rad etish asoslarini taqdim etish;
• “ayollar daftari”ga kiritilgan xotin-qizlarga ko‘rsatiladigan yordam turlarini ko‘rsatish;
• “ayollar daftari” orqali yordam ko‘rsatilayotgan xotin-qizlarning ro‘yxati va ularning har biriga ko‘rsatilgan yordamlarning aniq turlari, hajmi hamda kelgusida rejalashtirilayotgan tadbirlar bilan tanishib chiqish.

Avvalroq O‘zbekistonda “ayollar daftari”ga kiritilganlarga 5 million so‘mgacha kreditlar naqd berilishi mumkinligi, hokimlar “ayollar daftari”ga kiritilgan xotin-qizlarning uylarini ta’mirlab berishi, O‘zbekistondagi barcha xotin-qizlar “ayollar daftari”ga ro‘yxatga olinishi to‘g‘risida xabar berilgandi.