Samarqandda chorvachilikka ixtisoslashgan yangi universitet tashkil etildi

“Veterinariya va chorvachilik sohasida kadrlar tayyorlash tizimini tubdan takomillashtirish to‘g‘risida”gi prezident qarori qabul qilindi, deb xabar beradi Telegram’dagi “Huquqiy axborot” kanali.

Qarorga ko‘ra, Samarqand veterinariya meditsinasi instituti negizida Samarqand davlat veterinariya meditsinasi, chorvachilik va biotexnologiyalar universiteti tashkil etildi. Universitetda veterinariya, chorvachilik, biotexnologiya, agrotexnologiya, agroiqtisodiyot tarmoqlari uchun oliy ma’lumotli kadrlar tayyorlanadi.

Qaror bilan tasdiqlangan universitet Boshqaruv kengashi ta’lim yo‘nalishlari va mutaxassisliklar uchun ta’lim davomiyligi muddatlarini belgilaydi. Universitet Veterinariya va chorvachilikni rivojlantirish davlat qo‘mitasi tizimida faoliyat yuritadi.

Ta’limning amaliyot bilan uyg‘unligini ta’minlash uchun universitetda Veterinariya klinikasi va kasalliklar diagnostikasi texnoparki tashkil etilgan. Universitetga sohada 5 yillik stajga ega xodimlar tavsiyanoma asosida o‘qishga tavsiya etilganda, to‘lov-kontrakt miqdori kunduzgi ta’lim yo‘nalishidagi to‘lov-kontrakt (stipendiyasiz) miqdoriga tenglashtiriladi.

Qarshi irrigatsiya va agrotexnologiyalar institutida 2022/2023-o‘quv yilidan “Chorvachilik mahsulotlarini qayta ishlash texnologiyasi” ta’lim yo‘nalishida kadrlar tayyorlanadi.

Qamashi xizmat ko‘rsatish texnikumi negizida Qamashi veterinariya meditsinasi texnikumi tashkil etilgan. 2022/2023-o‘quv yilidan veterinariya va biotexnologiya yo‘nalishlari uchun “El-yurt umidi” jamg‘armasidan har yili alohida kvota ajratiladi.

Eslatib o‘tamiz, Prezident Shavkat Mirziyoyev 16-fevral kuni chorvachilik tarmog‘ini qo‘llab-quvvatlash yuzasidan o‘tkazgan videoselektor yig‘ilishida chorvachilikning ozuqa bazasini mustahkamlash masalasiga alohida to‘xtalib o‘tgandi. Yig‘ilishda O‘zbekistonda hokimlar yil oxiriga qadar chorvachilik yo‘nalishida 100 ming aholining bandligini ta’minlashi bo‘yicha vazifa qo‘yilgan.

Avvalroq Navoiy davlat konchilik instituti qayta tashkil etilgani, mazkur OTMga universitet maqomi berilgani to‘g‘risida xabar qilingandi.