“PSJ” hujumchisi Kilian Mbappe kelajagi borasidagi savollarga javob berdi.
“Hali kelajagim borasida bir qarorga kelmadim, buni hamma biladi. Takliflarni ko‘rib chiqyapman, yangi ma’lumotlar qo‘shildi, ko‘p narsalar o‘zgargan. Agar qaror qabul qilib bo‘lganimda, buni ma’lum qilgan bo‘lardim.
‘PSJ’da qolishim mumkinmi? Ha, albata”, — deydi Mbappe.
23 yoshli fransuz 30-iyun kuni erkin agentga aylanadi. Kilianga asosiy da’vogar “Real” bo‘lib turibdi.
“PSJ” Mbappega 50 million yevro maosh va yana qo‘shimcha 100 million yevro bonus bilan yangi shartnoma taklif qilgani haqida xabar berilgandi.
Bungacha Kilian “PSJ” tarixida eng yaxshi to‘purarga aylanish uchun klubda qolishi mumkinligi xabar qilingandi. Shuningdek, Fransiyaning amaldagi va sobiq prezidentlari ham Kilian Mbappega “PSJ”da qolishni maslahat bergandi.
Mbappe 2017-yildan buyon “PSJ” sharafini himoya qilib kelmoqda. Joriy mavsum futbolchi Fransiya chempionatining 27 o‘yinida ishtirok etib, 17 ta gol va 13 ta golli uzatmaga mualliflik qildi.