Surxondaryo viloyatining Uzun tumanida fuqarolarning pensiya va nafaqa pullarini onlayn totalizator o‘yinlariga ishlatib yuborgan bank kassiri ushlandi, deb xabar beradi Bosh prokuratura huzuridagi departamenti.
Ma’lum qilinishicha, departamentning Uzun tuman bo‘limi tomonidan “Xalq banki” tuman filialining murojaatiga asosan tergovga qadar tekshiruv o‘tkazilgan. Tekshiruv davomida filialning 2-son sayyor kassasi kassiri A.A. 2022-yilning fevral—mart oylarida o‘ziga biriktirilgan hududda 278 nafar fuqaroga naqd pul ko‘rinishida chiqarilgan jami 121,1 million so‘m pensiya va nafaqa pullarini ularning nomidan soxta imzolar qo‘yish orqali o‘zlashtirgani aniqlangan. Kassir ushbu pullarni internet tarmog‘idagi 1Xbet onlayn kazino o‘yinlariga ishlatib, talon-toroj qilgan. Tekshiruv davomida departament aralashuvi bilan 117 million so‘m qaytarilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 228-moddasi (hujjatlarni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq O‘zbekistonda 2021-yilda totalizator va bukmekerlikni reklama qiluvchi 30 dan ortiq sayt bloklangani, Xorazmda totalizator orqali qo‘lga kiritgan 4 ta uy va 3 ta mashinani farzandlari nomiga rasmiylashtirgan fuqaroga jinoyat ishi qo‘zg‘atilgani, o‘zbekistonlik ayol erining 400 mln so‘mini totalizatorda yutqazib qo‘ygani to‘g‘risida xabar berilgandi.
Izoh (0)